Ég tek eftir því hvað ég get verið duglegur að nöldra í skrifum mínum um eitthvað neikvætt. En það má ekki gleyma því að heimurinn er fullur af gleði og góðmennsku. Fullur af góðu fólki sem vill öðrum vel. Það góða á líka skilið að fá athygli.
Síðastliðinn sólarhring hef ég átt samskipti við nokkra úr þeim hópi. Í morgun aðstoðaði yndislegur tannlæknir miðjudrenginn minn með einstaklega hlýlegri framkomu. Ég hef átt í góðum samskiptum við frábæra kennara sem leggja sig fram til að sjá til þess að börnunum mínum vegni vel og líði vel í skólanum.
Í gær sinnti frábær starfsmaður í gleraugnaverslun mér og mínum ónýtu augum í augnskoðun. Og síðast en ekki síst hitti ég í vikunni yndislega sálfræðinginn minn, sem hefur hjálpað mér mikið.
Þetta fólk vinnur ólík störf, en á það sameiginlegt að láta sig aðra varða. Það skiptir máli hvernig við mætum hvert öðru, hvort sem við erum að aðstoða barn, kenna eða sinna manneskju sem leitar hjálpar.
Ég er svo þakklátur fyrir allt það góða fólk sem er í lífi mínu og ég á samskipti við reglulega. Það er fátt sem bætir lífsgæðin meira en góð samskipti við gott fólk.
