Um rasisma og ofbeldishótanir
Höfundur: Sigurður Hólm Gunnarsson
Efnisorð: Fjölmenning, Fordómar, Lög og reglur
Viðbrögð: Ummæli (
Rasistinn Ásgeir Hannes Eiríksson segist hafa fengið hótunarbréf frá “útlendingi” sent til sín vegna skoðana sinna. Ljótt ef satt er. Menn eiga aldrei að þurfa að líða hótanir vegna skoðana sinna, sama hversu gagnrýnisverðar skoðanir þeirra annars eru. Ásgeir sagði í DV í gær að lögreglan hefði brugðist skjótt við og “haft hendur í hári Ganaverjans”. Það er að vissu leyti ánægjulegt að lögreglan skuli nú bregðast við hótunum. Þegar ég reyndi fyrir nokkrum árum að leggja fram kæru gegn íslenskum rasista sem hringdi heim til mín og hótaði mér öllu illu þá ráðlagði lögreglan mér sérstaklega að kæra ekki!* Ég ætti ekki að taka slíka hótun alvarlega. Þegar ég óskaði eftir því að koma mín á lögreglustöðina yrði þá bókuð var mér sagt að slíkt gerði lögreglan ekki. Kannski hefur litarháttur þess sem hefur í hótunum áhrif á aðgerðir lögreglu?
Ganabúar og íslenskir rasistar
Kannski eru Ganabúar taldir hættulegri menn en íslenskir rasistar? Mér skilst að Ganabúar séu flestir svartir á meðan íslensku rasistagreyin eru hvít. Kannski hefur það áhrif? Sumir eru þó þeirrar skoðunar að allar hótanir eigi að taka alvarlega. Sérstaklega í þeim tilfellum þar sem brotamaðurinn er þekktur ofbeldisseggur eins og rasistinn sem hafði samband við mig.
Sjá: Formaður Félags íslenskra þjóðernissinna hefur í hótunum
Og þú getur tekið þessu sem hótun
“Ég krefst þess einfaldlega að þú dragir þessi orð þín til baka opinberlega annars mun ég sjá til þess að komið verði í veg fyrir frekari frama þinn hér á landi… Og þú getur tekið þessu sem hótun.Hvað ertu að gefa í skyn? Ertu í alvörunni talað að hóta mér? Hvernig þykist þú ætla að koma í veg fyrir minn ,,frama“ eins og þú orðar það?
Já þetta er hótun. Þú veist fullvel hvernig fólk stendur á bak við mig í þessu og þú veist hvernig hlutirnir ganga fyrir sig í þessum heimi.
Hvers konar hótun er þetta?
Það kemur bara í ljós þegar að því kemur. Ég skil ekki hvernig þér er stætt á þessu. Þú sem hefur sjálfur talað um að við séum ofbeldisfullir nasistar.
Já og hvað með það?
Bara það að ef þú dregur ekki orð þín til baka opinberlega þá tökum við til okkar ráða.”
Hart tekið á hótunum?
Í umræðuþættinum Reykjavík síðdegis á Bylgjunni, þar sem alltof oft er rætt gagnrýnislaust við rasista, var í gær talað við Hjört nokkurn sem er tengdur Framfaraflokknum (sem hefur sérstaka andstyggð á útlendingum)**. Hann sagðist einnig hafa fengið hótanir vegna skoðana sinna (líklegast frá sama manni og hótaði Ásgeiri). Hjörtur sagðist í viðtalinu hafa farið til lögreglu og látið sérstaklega bóka þessar hótanir. Lögreglan tók víst vel í þessa beiðni Hjartar og sagði að alltaf þyrfti að taka svona hótanir alvarlega.
Úr viðtali við Hjört í Reykjavík síðdegis á Bylgjunni 12. október 2004.
“Eins og lögreglan sagði við mig þá er þetta eitthvað sem ekki er hægt að líða, þetta er bara lögbrot, brot á almennum hegningarlögum og eitthvað sem við getum ekki sætt okkur við hér á landi.”
“Eins og lögreglan sagði við mig þá veit maður aldrei. Þó það séu ekki nema fimm prósent líkur á því að það sé einhver alvara á bak við þetta þá er það nóg.”
Þetta kom mér á óvart þar sem lögreglan harðneitaði að bóka áhyggjur mínar og hvatti mig sérstaklega til að kæra ekki.
Sjá: Hugleiðingar um réttarríkið
“Af einhverjum ástæðum geta íslenskir þegnar ekki lagt fram kæru um helgar þar sem rannsóknarlögreglan er í fríi. Að þessu komst undirritaður þegar hann gerði tilraun til þess að kæra áðurnefnda hótun daginn eftir að hún barst. Rannsóknarlögreglan var auk þess í páskaleyfi fram á þriðjudag og urðu fórnarlömb ofsókna því einfaldlega að bíða þar til helgihaldi lauk. Það var þó ekki aðeins fjarvera rannsóknarlögreglu þennan laugardagsmorgun sem hefur valdið mér hugarangri. Það sem mér þykir verst er að gefið var í skyn að jafnvel þótt að rannsóknarlögreglan hefði verið á staðnum hefði ekkert verið gert. Mér var beinlínis sagt að ég hefði líklegast ekkert upp úr því að kæra.
Máttleysi lögreglu
Vinalegi lögreglumaðurinn sem ég ræddi við benti mér á að ef formaður FÍÞ myndi hringja aftur yfir páskana gæti ég látið opna fyrir símann minn á þriðjudeginum og þá gæti lögreglan rekið símtalið ef formaðurinn myndi hringja í ÞRIÐJA SINN eftir þann tíma. Ég reyndi að segja lögreglumanninum að ég óttaðist nú ekki beinlínis símhringingar frá títtnefndum formanni en það hafði engin áhrif. Hann sagði mér að ég hefði ekkert að óttast og að ég gæti komið aftur á þriðjudaginn ef ég vildi enn kæra. Ég spurðist þá fyrir um hvort það væri ekki hægt að bóka komu mína á lögreglustöðina þennan daginn en svo var ekki. Lögreglumaðurinn lofaði því þó að hann skyldi ,,muna eftir mér“.Ég kann að vera of kröfuharður á þjónustu lögreglunnar en ég átta mig ekki alveg á því hvers vegna lögreglustöðin var yfirleitt opin þessa páskahelgi. Ekki var hægt að kæra og ekki heldur hægt að bóka komu mína. Það eina sem ég hafði upp úr þessari heimsókn var vinalegt spjall. Ég hefði alveg eins getað hringt í vinalínuna.”
Hvers vegna hótanir frá Ganabúum eru teknar alvarlegar en ekki hótanir frá íslenskum rasistum veit ég ekki. Kannski einhver frá lögreglunni geti svarað því?
Eru rasistar saklaus fórnarlömb?
Svo það sé á hreinu þá tel ég allar ofbeldishótanir óafsakanlegar, líka gagnvart rasistum. Sá sem hefur sent íslenskum rasistum hótunarbréf ætti að skammast sín og biðjast afsökunar. Rasistar hafa gerst sekir um að breiða út fordóma gagnvart útlendingum og þar með valdið fjölmörgum saklausum einstaklingum vanlíðan og jafnvel óbætanlegu tjóni. Reiði er skiljanleg en hún afsakar ekki ofbeldishótanir.
Það fer hins vegar svolítið í taugarnar á mér að nú keppast fjölmiðlar við að tala við Ásgeir Hannes, Hjört og aðra rasista eins og þeir séu saklaus fórnarlömb sem vilja bara “fjalla um innflytjendamál á málefnalegan máta”. Það þarf ekki mikla blaðamennsku til að komast að því að umfjöllun rasista um innflytjendamál hefur verið allt annað en málefnaleg. Nóg er að kíkja á greinar, vefsíður og annað efni sem þessir menn bera ábyrgð á.
*Ég reyndar ákvað samt að kæra. Eftir nokkra mánuði var mér svo tilkynnt að málið hefði verið látið niður falla.
**Sjá Rasistar styðja útlendingafrumvarpið
Nánar:
Formaður Félags íslenskra þjóðernissinna hefur í hótunum
Hugleiðingar um réttarríkið
Sæll Siggi,
Leiðinlegt að heyra að lögreglan hafi ekki tekið þá hótun sem þér barst alvarlega. Slæmt mál ef satt er, veit ekki hvað ætti að valda því. Rétt er þó að geta þess að þegar ég fór til lögreglu með bréfið sem mér barst í febrúar sl. lá ekkert fyrir um það hver hefði sent það, hvort það væri útlendingur eða innlendur einstaklingur.
Ég tók reyndar sérstaklega fram við lögregluna að ég vildi ekkert ákveða í þeim efnum jafnvel þótt bréfið væri ritað á bjagaðri íslenzku. Ég væri einfaldlega ekki í neinni aðstöðu til að meta það hvort einhver útlendingur hefði skrifað bréfið eða einhver Íslendingur sem vildi láta líta út fyrir að útlendingur hafi ritað það.
Ég var spurður hvort ég vildi kæra málið eða bóka það og ákvað ég að bóka málið ef vera kynni að aðeins væri um einstakt tilfelli að ræða. Viðkomandi hafi kannski sent bréfið í reiði og séð eftir því. Ég vildi ekki gera mál úr óhamingju þess sem sendi bréfið nema framhald yrði á sem nú er orðið. Það má því segja að viðkomandi einstaklingur hafi fengið ákveðið tækifæri til að sjá að sér sem hann ljóslega gerði ekki, því miður.
Síðar fékk ég tölvupóst sendan sem var greinilega frá sama einstaklingi og var hægt að rekja hann. Þetta var í mars sl. og vissi ég þá þegar allt um þann einstakling sem nú liggur undir grun um að hafa sent þessi bréf. Raunar hefur hann gengist við því við lögreglu í gegnum símann að mér skilst. En ég aðhafðist þó ekkert þá, tilkynnti bara lögreglu um þennan tölvupóst en lét þar við sitja. Raunar voru engar hótanir í þessum tölvupósti heldur aðeins úthúðanir.
En það verður allavega ekki sagt að ég hafi verið að sækjast eftir að gera mál úr þessu. Hef engan áhuga á því og vildi helzt að þessi einstaklingur hefði bara svarað mér málefnalega hafi hann verið ósáttur við það sem ég hef sagt í stað þess að fara þessa leið sem auðvitað ætti aldrei að fara. Þetta er leiðindamál og bara sorglegt þegar fólk tekur upp á slíku, sama hver á í hlut. Enda skiptir það mig engu máli þó hinn grunaði í málinu sé útlendingur og hvað þá ættaður frá Afríku. Ég hefði alveg sömu afstöðu þó um skjannahvítan Íslending væri að ræða.
Ég tók einmitt fram, bæði við lögreglu á sínum tíma og á Bylgjunni í gær (eins og þú væntanlega veist), að mér væri vitanlega sama gegn hverjum svona lagað beindist, um hvaða mál það snerist eða hver stæði fyrir því. Svona lagað ætti auðvitað ekki að líðast þannig að við erum væntanlega sammála um það. Þá var ég einmitt ekki sízt með í huga hótunina gegn þér á sínum tíma sem lögreglan einmitt minntist á við mig og sagði að svona hótanir hefðu verið á hinn veginn líka sem ég sagðist vita af og væri auðvitað ekki síður ámælisvert.
Ummæli þín um að ég sé rasisti vísa ég annars bara til heimahúsanna. Samkvæmt þeirri grein sem þú ritaðir á sínum tíma um Framfarafélagið og útlendingafrumvarpið sl. vor er ekki að skilja annað en að þú skilgreinir alla ríkisstjórnina, þá sem greiddu frumvarpinu atkvæði sitt á Alþingi og aðra stuðningsmenn þess sem rasista. Þú tekur allavega sem dæmi um meintan rasisma Framfarafélagsins að það hafi stutt umrætt frumvarp.
Þá hljóta þeir sem studdu það á Alþingi og veittu því brautargengi, Björn Bjarnason, dómsmálaráðherra og þeir starfsmenn dómsmálaráðuneytisins, lögreglunnar og Útlendingastofununar, sem komu að gerð frumvarpsins, að vera alveg jafnmiklir og jafnvel meiri rasistar en nokkurn tímann þeir sem eru í Framfarafélaginu að þínu mati. Slíkar aðdróttanir dæma sig þó bara sjálfar að mínu mati.
Ég hef aldrei talað um fólk á grundvelli kynþáttar, þjóðernis eða nokkurs slíks nema sem tilvitnun í fjölmiðla, opinberar skýrslur (innlendar og erlendar) eða skýrslur frá óháðum en viðurkenndum rannsóknarstofnunum s.s. háskólastofnunum. Þessir aðilar eru þá væntanlega rasistar líka samkvæmt þínum kokkabókum. Eini greinarmunurinn sem ég geri á fólki í þessum efnum er hvort fólk er íslenzkir eða erlendir ríkisboagarar og gildir húðlitur þar einu og annað slíkt.
Ef þetta er mismunun á grundvelli uppruna, að ég skuli vera þeirrar skoðunar að eðlilegt sé að íslenzkir ríkisborgarar njóti ríkari réttindastöðu á Íslandi en erlendir upp að vissu marki (og sama gildir þá auðvitað almennt séð um íslenzka ríkisborgara erlendis og erlenda ríkisborgara í þeirra heimalöndum), er það mismunun sem er viðgengst og er viðurkennd alls staðar í hinum vestræna heimi og talin ekkert nema eðlileg. Að öðrum kosti er hætt við að íslenzkur ríkisborgararéttur í þessu tilfelli væri ekki pappírsins virði. Ef ég væri virkilega rasisti á þessum forsendum þá er það sama ekki ósennilega að segja um meirihluta íbúa hins vestræna heims og jafnvel langt út fyrir hann.
Vil annars þakka fyrir þennan ágæta vef þinn Siggi, þetta er ágætissíða og gott að slíkur vefur sé til þó ég sé ekki alltaf sammála því sem þú hefur sjálfur að segja á honum
Það breytir því þó auðvitað ekki að þú átt fullan rétt á að tjá þínar skoðanir og að sjálfsögðu virði ég það. Vona að það sé gagnkvæmt að þú virðir minn rétt í þeim efnum 
Við hæfi að lokum að vitna í eftirfarandi orð sem eignuð eru Voltaire:
„I may disagree with what you have to say, but I shall defend to the death your right to say it.“
Hafðu það annars bara sem allra bezt félagi,
Beztu kveðjur,
Hjörtur J.
Sæll Hjörtur. Ég hélt að þú værir sáttur við að vera kallaður rasisti, enda ber félagsskapurinn sem þú hefur starfað með (Framfarafélagið) öll merki rasisma. Það má örugglega kalla þessi sjónarmið eitthvað annað, ég kýs að kalla þau rasisma.
Hjörtur segir:
Það er nú ekki rétt, þó að skoðanir sumra innan ríkisstjórnarinnar hafi óneitanlega einkennst af rasisma. Ég útskýri hins vegar nokkuð ítarlega hvers vegna ég kalla ykkur í Framfarafélaginu rasista.:
Sjá nánar Rasistar styðja útlendingafrumvarpið þar sem dæmi eru tekin af málflutningi Framfarasinna.
Hjörtur segir:
Það kann að vera að þú áttir þig ekki á því en málflutningur þinn og félaga þinna í Framfarafélaginu er hreinn rasismi. Ólíkt mörgum skoðanabræðrum ykkar passið þið ykkur á að segja ekki opinberlega setningar eins og: ,,Það þarf engan snilling eða erfðafræðivísindamann til að sýna fram á hver munurinn er á Afríkunegra með prik í hendinni eða Íslendingi.“ Það sem þið hins vegar gerið (í nafni upplýstrar umræðu!) er að safna saman ótal fréttum og skýrslum sem eiga það eitt sameiginlegt að segja eitthvað neikvætt um innflytjendur. Slíkur einhliða áróður er engu skárri en segja beint út hvað ykkur finnst: “Innflytjendur eru vont og hættulegt fólk”.
Ég gæti auðveldlega búið til vefsíðu þar sem ég birti bara fréttir og skýrslur sem sýndu kvenfólk í neikvæðu ljósi og barist síðan gegn réttindum kvenna. Þá yrði ég kallaður fordómafullur og karlremba, og það með réttu. Að sama skapi kalla ég ykkur fordómafulla rasista.
Hjörtur segir:
Voltaire sagði líka:
„All it requires for the forces of evil, bigotry, superstition and ignorance to keep their grip on the minds of the people is that good men and women continue to do nothing.“
Ekki vil ég banna þér að tjá þig. Þú skalt þó vita að málflutningur þinn (hvort sem þú gerir þér grein fyrir því eða ekki) hefur valdið fjölmörgum innflytjendum (og íslenskættuðum fjölskyldum þeirra, ef það skiptir þig máli) sálarkvölum. Einhliða áróður ykkar um að innflytjendur séu varasamt fólk hefur nefnilega áhrif. Áhrif á líf þeirra einstaklinga sem verða fyrir barðinu á áróðrinum, og ekki síst hefur áróðurinn áhrif á saklaus börn þeirra. Hafðu þetta hugfast.
Sæll Siggi aftur,
Takk fyrir svarið. Ég vísa nú bara afgreiðslu þinni á málinu aftur til heimahúsanna, sér í lagi meintum hugsanalestri þínum hvað mig varðar og okkur í Framfarafélaginu. Afgreiðsla þín ætti hugsanlega að einhverju leyti við ef ég eða við hefðum einhvern tímann sagt að allir innflytjendur væru slæmir eða eitthvað þvíumlíkt sem er auðvitað alger vitleysa. Það höfum við aldrei sagt, eðli málsins samkvæmt, og tekið það ósjaldan skýrt fram.
Við höfum aðeins bent á að það ber að varast ýmislegt í þessum efnum, sem er svo sannarlega satt og rétt og hlýtur að mega benda á án þess að fá yfir sig einhvern ósóma. Ef þú héldir úti vefsíðu þar sem þú hamraðir á því að ALLAR konur sem slíkar væru vondar og þar fram eftir götunum væri sennilega hægt að kalla þig kvenhatara, kartrembu o.s.frv. En það væri annað mál ef þú væri einungis t.d. að beina spjótum þínum að konum sem vanræktu börn sín eða eitthvað slíkt.
Dæmi þitt er álíka gáfulegt og ef VÍS safnaði fréttum á heimasíðu sína um ökumenn sem hefðu keyrt undir áhrifum áfengis, of hratt eða hegðað sér ósæmilega í umferðinni á annan hátt og þú sakaðir þá VÍS-menn um að vera einhverja ökumannahatara fyrir að vekja athygli á að ýmislegt bæri að varast í umferðinni, þar væru sumir ökumenn sem væru varasamir og jafnvel að of þung umferð væri á ákveðnum stöðum í vegakerfinu og því væri úrbóta þörf í þeim efnum. T.d. takmarka umferð með hraðahindrunum eða á annan hátt eða auka möguleika vegakerfisins til að taka við allri þessari umferð.
Já eða að þú sakaðir einhvern stjórnmálamann, sem talaði fyrir aðhaldi í heilbrigðiskerfinu, um að vera sjúklingahatari eða eitthvað þvíumlíkt og vilja ekkert frekar en að láta sjúklingum og aðstandendum þeirra líða illa, gera þeim lífið erfitt og þar fram eftir götunum. Þetta nær auðvitað engri átt.
Yfirlýsingar þínar um að ég sé rasisti og þar fram eftir götunum gef ég ekki meira fyrir en áður. Skilgreiningar á rasisma samkvæmt orðabókum eru reyndar ekki alveg samdóma, en flestar eru þó sammála um að rasismi sé að telja einn kynþátt æðri öðrum (yfirleitt sinn eigin) og mismunun og fordómar sem afleiðing af þeirri trú.
Í fyrsta lagi lít ég ekki svo á að einhver einn kynþáttur sé öðrum æðri. Dettur slíkt ekki í hug og hef aldrei haldið slíkri vitleysu fram. Og í annan stað hef ég aldrei nokkurn tímann beitt fólk mismunun á grundvelli kynþáttar (eða öðru slíku) þess og alls ekki sem afleiðing af einhverri trú minni á yfirburði eins kynþáttar sem ég aðhyllist alls ekki eins og áður segir. Næst á eftir eldri borgurum er ég sennilega aldrei kurteisari en við fólk af erlendum uppruna. Finnst það bara sjálfsagt. Þannig að alveg rólegur á yfirlýsingunum.
Málflutningur okkar í Framfarafélaginu í þessum efnum hefur byggst á tveimur atriðum fyrst og fremst, mikilvægi aðlögunar með reynzlu nágrannaþjóða okkar í huga og nauðsyn almennrar og málefnalegrar umræðu um þessi mál svo komast megi að sem skynsamastri niðurstöðu varðandi þau.
Annars er það varla mín mismunun eða Framfarafélagsins að hafa stutt frumvarp ríkisstjórnarinnar um breytingar á útlendingalögunum í vor. Það er bara mín og okkar skoðun sem okkur er væntanlega frjálst að hafa. Þú vildir taka stuðning okkar við þetta frumvarp sem dæmi um meintan rasisma okkar. Og ef það er rasismi af okkar hálfu að styðja þetta frumvarp, hvað má þá segja um þá sem stóðu að því, sömdu það, veittu því brautargengi á hinu háa Alþingi eða studdu það að öðru leyti? Þá hljóta ALLIR þessir aðilar að vera rasistar skv. þínum kokkabókum séum við það vegna stuðnings okkar við frumvarpið sem ekki var mikið meiri en að álykta um málið. Það segir sig væntanlega sjálft þó þú virðist vilja skafa yfir það.
Mér virðist annars á öllu að þú hafir einfaldlega ákveðið það fyrirfram að ég og við í Framfarafélaginu værum rasistar, bitið það í þig og svo reynt að tína eitthvað saman til að rökstyðja þá fyrirfram ákveðnu skoðun þína. Slíkt hefði ég haldið að teldust fordómar.
Eigðu góðar stundir félagi
Hjörtur
Es. Þessari tilvitnun þinni mætti þess vegna alveg snúa upp á þig líka
Sæll aftur Hjörtur.
Það er ljóst að þú vilt skilgreina rasisma á annan veg en ég. Ég hika ekki við að kalla málflutning ykkar í Framfarafélaginu rasisma og vísa þar í það sem ég hef áður sagt. Ætla ekki að endurtaka mig. Þú segir að þið haldið því ekki fram að ALLIR innflytjendur séu slæmir.
Þú segir:
Þetta er það sem ég, mannréttindasamtök og innflytjendur sjálfir tala um! Það er enginn að halda því fram að það geti ekki vandamál fylgt innflytjendamálum. Vandamálin geta verið mörg og þau þarf að leysa! Ef þú hefðir áhuga á að kynna þér það þá vissir þú að þetta er einmitt það sem við sem berjumst fyrir umburðarlyndi og innflytjendur sjálfir leggja mikla áherslu á að tala um.
Málflutningur rasista gengur hins vegar beint eða óbeint út á það að flokka fólk í okkur og hin. Íslendinga og útlendinga, siðmenningu og villimennsku. Í staðin fyrir að vinna að umburðarlyndi og samvinnu er áhersla lögð á að sýna fram á að fólk af ólíkum uppruna geti ekki búið saman.
Lítum aðeins nánar á málflutning á heimasíðu ykkar (sem hefur núna reyndar verið fjarlægður):
Sjá Rasistar styðja útlendingafrumvarpið
Taktu eftir því að hver einasta “frétt” á vefsíðu ykkar fjallar um innflytjendur í vægast sagt neikvæðu ljósi. Prufaðu að taka út orð eins og “útlendingar” og “innflytjendur” og settu “gyðingar” í staðinn.
Ég skynja það á málflutningi þínum að þú telur þig alls ekki vera rasista. Málflutningur ykkar er þó keimlíkur þeim sem nasistar stunduðu í Þýskalandi hér ekki fyrir svo löngu. Með hræðilegum afleiðingum. Blöðin voru uppfull af fréttum og greinum um meint vandamál vegna gyðinga. Gerir þú þér ekki grein fyrir því hversu hættulegur svona málflutningur er?
Þú ættir að gera þér grein fyrir því málflutningur af þessu tagi er skapaður til að ýta undir fordóma. Eða hvað? Finnst þér ekkert að svona málflutningi? Ef maður á að taka þessar fréttir ykkar alvarlega þá hlýtur maður að draga þá ályktun að innflytjendur séu stórhættulegt fólk. Ef þú hefur ekki þegar áttað þig á því þá bið ég þig aðeins að hugsa málið. Hvað á innflytjandi sem les þennan áróður að halda? Hvað eiga þeir sem vita ekkert meir um innflytjendamál en það sem þeir lesa á vefsíðunni ykkar að halda?
Hugsaðu aðeins málið.
Siggi
Sæll félagi,
Ég sé ekki að neitt hafi bæzt við það sem þú hefur áður sagt og ekkert sem hrekur það sem ég hef sagt að séð verði.
Ég lít ekki á rasisma öðrum augum en þú held ég, nema hvað að ég stunda ekki hugsanlestur eins og þú virðist gera eða að gera öðrum upp skoðanir. Rök þín um meintan rasisma minn virðast meira eða minn byggjast á einhverju huglægu mati þínu, hvað þú telur, heldur, finnst vera keimlíkt því sem ég segi o.s.frv. M.ö.o. ekki sérlega naglfast.
Ítreka að við höfum aldrei beint spjótum okkar að innflytjendum sem slíkum í heild, það höfum við ítrekað tekið fram og hamrað á á undanförnum árum. Hina vegar lítum við að sjálfsögðu ekki svo á að innflytjendamálin séu yfir gagnrýni hafin þó einhverjir kunni að vera þeirrar skoðunar.
Hinn almenni innflytjendi, sem les það sem ég eða við höfum sagt um þessi mál, ætti því ekki að þurfa að taka það til sín frekar en ég og þú sem ökumenn höfum ástæðu til að taka nærri okkur gagnrýni á ökumenn sem keyra undir áhrifum áfengis. Það er einfaldlega ekki verið að tala um okkur í þeim efnum né alla ökumenn eins og þeir leggja sig.
Ég geri mér fulla grein fyrir því hvað ég segi um þessi mál en get engan veginn borið ábyrgð á því þó einhverjir kjósi að mistúlka orð mín eða draga rangar ályktanir af þeim. Gagnrýni okkar er einfaldlega ekki beint gegn innflytjendum sem slíkum og eins og fyrr segir höfum við ítrekað lagt áherzlu á það á liðnum árum.
Ráðlegging mín til þeirra sem einungis lesa síðuna okkar (sem er jú niðri í augnablikinu eins og þú réttilega nefndir) er annars einfaldlega sú að kynna sér sem flestar hliðar þessa máls. Það er eina vitið.
Þetta síðasta innlegg þitt er annars álíka gáfulegt og að skamma Heimdellinga fyrir að setja aðeins fram neikvæða gagnrýni á Samfylkingarfólk á Frelsi.is og segja: „Hvað eiga þeir sem vita ekkert meir um Samfylkinguna en það sem þeir lesa á vefsíðunni ykkar að halda?“ Já, ljótt er það…
Gott annars að vita að við séum sammála um aðlögunina og umræðuna (skildist það allavega), en það er eins og áður segir tvö grundvallaratriðin í okkar málflutningi og hefur verið frá upphafi.
Hafðu það gott félagi
Hjörtur
Ef þú getur ekki séð rasismann í málflutningi þínum þá verður bara að hafa það. Mér og öðrum finnst hann augljós. Þú getur fullyrt út í hið endalausa að gagnrýni ykkar hafi ekkert með innflytjendur persónulega að gera. Það breytir ekki þeirri staðreynd að nánast öll umfjöllun ykkar gengur út á það að gera innflytjendur tortryggilega (vísa ég enn og aftur í það sem ég hef áður skrifað hér).
Ef þú hefur minnsta áhuga á að ræða um innflytjendamál og aðra málaflokka málefnalega og af yfirvegun þá ráðlegg ég þér að endurskoða málflutning þinn. Þú gætir líka tekið þátt í starfi mannréttindasamtaka og reynt að leggja þitt af mörkunum til að draga úr fordómum. Þá fyrst skal ég reyna að trúa því að þú viljir fjalla um innflytjendamál málefnalega. Þú og skoðanabræður þínir virðast hins vegar ekki hafa mikinn áhuga á því.
Sæll félagi,
Þú virðist nú vera eitthvað æstur út af þessu, það kann nú yfirleitt ekki góðri lukka að stýra í samræðum manna eða bara yfirleitt.
Nei veistu, ég er voðalega jarðbundinn einstaklingur og á voðalega erfitt með að samþykkja eitthvað sem ekki er annað að sjá en sé meira eða minna byggt á einhverju huglægu mati („mér finnst“-rök) eða einhverju þeim mun langsóttara.
Umfjöllun okkar gengur ekki út á það að gera innflytjendur sem slíka tortryggilega eins og ég hef margsagt en þú virðist bara ekki ná, eða ekki vilja ná. Ekki frekar en dæmið með ökumenn almennt og síðan ökumennina sem aka undir áhrifum. Það sér væntanlega hver sá sem er ekki fyrirfram búinn að gera sér upp skoðun í þeim efnum.
Á annars ekki þó von á að sannfæra þig um þetta enda virðist þú hafa bitið það í þig fyrirfram að ég sé rasisti og fæst varla ofan af þeim fordómum úr þessu. Verður svo bara að vera.
Bið þig vel að lifa og þakkir fyrir þetta spjall. Var að mörgu leyti áhugavert
Beztu kveðjur,
Hjörtur
Er ekki vitund æstur. Þó ég væri æstur myndi það ekki draga úr réttmæti þess sem ég hef sagt. Rökstuðningur minn stendur óhaggaður. Veltu því nú aðeins fyrir þér hvers vegna svo margir telja þig vera rasista. Vegna þess að þeir eru allir að misskilja þig? Eða er það vegna þess að það er ýmislegt „rasistalegt“ við málflutning þinn?
Veltu þessu fyrir þér.
Sæll félagi,
Gott að vita að þú sért ekki æstur
Veistu annars, langfæstir sem ég ræði þessi mál við telja mig vera rasista, nánast enginn reyndar. Það eru sárafáir sem ég veit um sem gera það og hef ég þó rætt þessi mál við æði marga í gegnum árin, og alls kyns fólk, útlendinga og Íslendinga og yfirleitt fólk sem ég þekki lítið eða ekkert en hitti við hin ýmsu tækifæri.
Þannig að ekki sannar það neitt. Kannski eru þessir „mörgu“ (lesist fáu að því er ég held a.m.k.) þínir bara með fordóma gegn mér líka eins og sjálfsagt fleirum. Þú ert afar ólíklega einn um það
Hafðu það gott að vanda
Beztu kveðjur,
Hjörtur
Heyrðu mig nú, Hjörtur, umfjöllun um innflytjendur og umfjöllun um ölvaða ökumenn er nú ekki hægt að líkja saman. Ölvaður ökumaður er maður sem hefur tekið heimskulega ákvörðun (að aka ölvaður) og er ábyrgur fyrir henni. Ef hann veldur slysi og það er talað um það er því ekki verið að tala illa um ökumenn almennt heldur ölvunarakstur og hvað hann sé heimskulegur og skaðlegur.
Innflytjendur falla ekki í sömu kategóríu. Sem hópur hafa þeir ekki gert neitt rangt. Þeir eiga það eitt sameiginlegt að vera fæddir annars staðar, og hvað með það? Hverju breytir það? Svar: Ekki miklu.
Umfjöllun Framfarafélagsins (sem öll var í anda argasta afturhalds) beindist að því einu að sýna innflytjendur í neikvæðu ljósi. Ekki ölvaða ökumenn úr hópi innflytjenda, ekki þjófa úr hópi innflytjenda, né aðra misindismenn, því þá hefði athyglin beinst að misgjörðum þeirra en ekki því að þeir væru innflytjendur. Væri eðlilegt að í hvert skipti sem rauðhærðir gera eitthvað af sér, þá væri það látið fylgja fréttinni að rauðhærður maður hefði verið á ferðinni? Eða örvhentur? Eða ættaður úr Vestmannaeyjum?
Innflytjendur eru fólk og eins og annað fólk eru þeir mennskir. Þeim getur orðið á í messunni eins og öðrum og það eru svartir sauðir meðal þeirra eins og annarra. En að stimpla innflytjendur, sem hóp, í neikvæði ljósi, fyrir það eitt að þeir séu mennskir eins og vér innfæddir? R-a-s-i-s-m-i. Eigum við ekki bara að koma okkur saman um þetta: Innflytjendur eru fólk og eiga að fá sömu meðferð og annað fólk – sanngjarna.
Varðandi innflytjendavandamál, þá er auðvitað satt að þau eru til. Eitt er alvarlegast og einna mest áberandi, og það heitir rasismi. Rasismi kemur upp bæði meðal innfæddra og innflytjenda, og rekur fleyg milli fólks sem enginn fleygur ætti að vera á milli. Þessum rasisma ber að róa gegn, öllum árum, enda er það öllum fyrir bestu.
Takk fyrir.
Jæja félagi. Þá er ég að færa þér fréttir. Þú hefur verið altalaður sem rasisti í mörg ár (stundum kallaður felurasisti). En það skiptir ekki máli. „Rasisti“ og „rasismi“ eru bara orð. Orð sem menn geta valið að skilgreina hvernig sem er. Gagnrýni mín á málflutning þinn stendur óhögguð. Mér er sama hvort þú vilt kalla þig „rasista“, „þjóðernissinna“, „frjálslyndan“ (ertu ekki í Frjálslynda flokknum?) eða hvað eina.
Ef þér líður betur máttu stroka út orðið „rasisti“ úr öllum málflutningi mínum og einbeita þér að þeirri efnislegu gagnrýni sem ég hef sett fram. Það sem ég kalla “rasisma” mátt þú kalla “gúbedígobb” mín vegna. Það eru orð þín og aðgerðir sem ég er að gagnrýna.
I rest my case
Sæll félagi,
Jæja, vel má vera að þú og einhver þröngur hópur (í kringum þig?) telji að ég sé rasisti. Fordómarnir eru víða því miður. En ég hef sem fyrr segir sáralítið orðið var við slíkt. Hefði án efa orðið mjög var við þetta ef þetta væri eins útbreidd skoðun og þú vilt meina. Meintur rökstuðningur þinn er annars vægast sagt gloppóttur og í bezta falli langsóttur. En það er ekki mitt vandamál
Virðist á öllu þessu að þú sért þeirrar skoðunar að ekki sé hægt að gagnrýna innflytjendamálin nema viðkomandi sé rasisti. Slík afstaða dæmir sig væntenlega sjálf.
So I rest my case too
Beztu kveðjur og takk fyrir mig
Hjörtur
Hvenær hef ég dæmt þig fyrirfram? Ég veit ekki betur en að ég hafi rökstutt vel og vandlega hvað það er í málflutningi þínum sem ég kalla rasisma.
Athyglisvert innlegg Vésteinn. Held að þú hafir komist að kjarna málsins. Ef það skapast vandamál tengd innflytjendum þá er það fyrst og fremst rasisminn sem verður til hjá ,,hinum“.
Ég get samt ekki séð að við getum rætt um innflytjendur á málefnanlegan hátt meðan við erum í orðaleikjapissukeppni um hver er hvað. Hvort að Hjörtur sé rasisti eða nasisti eða hvað annað, sé ég ekki hvernig það leysi neinn vanda. Afleiðingin af því er sú að menn verða einfaldlega pirraðir. Ég verð því að vitna í Laxness og spyrja ,,hvort ekki sé hægt að lyfta umræðunni á hærra plan?“
Af því sem ég hef lesið hérna þá finnst mér finnst mér aðalatriðin hafa gleymst. Og það er að vinna gegn rasisma og óheftri þjóðerniskennd. Einsog Vésteinn sagði þá skiptir það fyrst og fremst máli að fólk líti á hvert annað sem fólk. Ekki svarta, gula eða hvíta eða Íslendinga, Pólverja eða Surinama eða múslima, kaþólska eða heiðna. Ef maður spáir virkilega í hvað ofangreind atriði ættu að skipta miklu máli þá er eina skynsamlega svarið, að þetta ætti ekki að skipta neinu máli. Ekki einu einasta. Að halda öðru fram er hrein heimska.
Framfarafélagið og þessháttar samtök hafa verið iðinn við að benda á vandamálin sem stafa af útlendingum. Þeir vilja þó ekki láta bendla sig við rasisma þó að slíkar skoðanir þrífast innan þessa samtaka. Félagið hefur verið ötult um að benda á vandamál annarra Evrópuríkja og vara við að við lendum ekki í sama farinu. En hugmyndir um að Ísland sleppi við að hér setjist að innflytjendur er tímaskekkja og löngu úr sér gengin. Samanburður við önnur Evrópulönd er ekki boðlegur í umræðuna lengur þar sem aðstæður eru ekki sambærilegar. Útlendingarnir sem fluttu á til þessara landa er ekki að fara þaðan. Og þar liggur hundurinn grafinn. Miðað við alla þá þekkingu sem við búum við hlýtur það að vera markmið okkar að finna lausnir á því hvernig hægt sé að koma í veg fyrir að hér hreiðri um sig fordómar í garð innflytjenda í stað þess að banna útlendingum að setjast hér að. Og mig langar í kjölfarið að varpa þeirri spurningu fram við Framfarafélagið af hverju þeir koma ekki fram með lausnir á slíkum vanda í stað þess að vilja meina fólki að setjast hér að? Eru þeir virkilega á móti því að annað fólk setjist hér að og af hverju? Og ég vil ekki fá einhver svör um að við séum þjóð og þessháttar því slíkt hugtak er ekki hægt að skilgreina og því algjör markleysa.
Heyrpi góða líkingu á rasistaáróðri um daginn, þar sem innflytjendum var líkt við þá sem lenda í einelti og rasistar voru þá þeir sem lögðu í einelti. En þeir sem verða fyrir einelti eiga voða lítið sameiginlegt og eru oftast bara á röngum stað á röngum tíma. Ekkert að þeim frekar en hverjum öðrum. Þeir sem leggja hinsvegar í einelti eiga iðulega við persónuleg vandamál að etja, heimafyrir eða annarsstaðar. Og ég held að líkingin eigi ágætlega við um þá sem dreifa rasistaáróðri. Þeir ættu fyrst að skoða eigin garð áður en þeir skoða annan því ef þeir geta ekki leyst eigin vandamál þá eru þeir gjörsamlega vanhæfir til að aðstoða aðra í að finna lausnir. Og þeir sem geta ekki komið fram með lausnir eiga ekki erindi í þessa umræðu nema sem hlustendur.
Í DV um daginn var þetta viðtal við Ásgeir, og með því fylgdi mynd af honum þar sem hann skartaði húfu og trefli frá knattspyrnufélaginu Fylki. Fyrst Fylkir er flæktur í þetta (ég á ekki von á að stjórn Fylkis hafi verið spurð álits) tel ég að nú sé við hæfi að Fylkir sendi frá sér fréttatilkynningu þar sem hann afneiti þessari pólítík og sverji hana af sér.
Hvernig getur maður túlkað það, þegar eitt félag, í þessu tilfelli Fylkir, situr þegjandi undir því að vera bendlað við rasisma? Fyrst það gefur ekki út yfirlýsingu og firrir sig þannig málflutningi Ásgeirs, hvernig getur maður skilið það öðruvísi en sem þegjandi samþykki?