Sigur Framsóknarflokksins í kosningum má að einhverju leyti rekja til Icesave. Þegar dómur féll Íslandi í vil í Icesave málinu fullyrtu Framsóknarmenn og ýmsir aðrir að þeir höfðu haft „rétt fyrir sér“ og margir gáfu til kynna að allir aðrir væru bjánar og landráðsmenn. Enda var baráttan gegn Icesave samningunum knúin mikið til af reiði og þjóðerniskennd. Fólk úr ýmsum flokkum sem hafði stutt síðasta samning af skynsamlegum ástæðum fór að trúa vitleysunni frá Framsóknarflokknum. Sumir báðu þjóðina meira að segja afsökunar á afstöðu sinni.
Fáir þorðu að benda á að niðurstaðan kom mörgum af færustu lögfræðingum heims á óvart. Það var óvinsælt að benda á að það var fjárhættuspil að hafna samningum. Staðreyndin er sú að heppileg niðurstaða fyrir Ísland í Icesave málinu hafði ekkert með snilligáfu þeirra sem voru á móti samningum að gera. (Sjá: Icesave og sigur lýðræðisins? og Ég hafði ekki rangt fyrir mér – Spuninn um Icesave)
Farsæl niðurstaða í Icesave málinu varð til þess að efla trú fólks á Framsóknarflokknum og gat flokkurinn í kjölfarið fullyrt út í bláinn og án teljandi mótstöðu að hægt væri að afskrifa skuldir allra landsmanna með því að skjóta vonda útlenda hrægamma eða berja þá með kylfum.
Þeir sem efast um að leið Framsóknarflokksins sé fær eða yfirleitt skynsamleg eru sakaðir um vilja "vernda fjármálkerfið" og um að vera á „móti heimilunum í landinu“. Gott ef menn eru ekki einnig sakaðir um landráð.
Ég óttast að þessi undarlega umræða sem er mikið til byggð á tilfinningum og þjóðerniskennd en ekki rökum og gagnrýnni hugsun eigi eftir að reynast okkur öllum hættuleg.
Skoða 1 athugasemdFela athugasemdir
Frá mínu sjónarmiði fjallaði Icesave ekki um tilfinningar og þjóðerniskennd. Hér var um prinsipmál að ræða. Það prinsip hvort að fyrirkomulag mála innan EB/EES sé og eigi að vera þannig að einkafyrirtækjum sé frjálst að stofna til óheyrilegra skulda og velta þeim síðan yfir á skattgreiðendur.
Sem betur fer kom í ljós að svo var ekki. Hefði hins vegar dómstóllinn staðfest að það væri gott og gilt fyrirkomulag þá er ég hræddur um að það hefði farið að fara um ýmsa þá sem aðhyllast EB bæði á Íslandi og annars staðar.
Og vinstri stjórn, sem réri að því öllum árum og eyddi öllu þessu púðri í að reyna að velta þessum skuldum fjárglæframanna yfir á skattgreiðendur, var dæmd til þess að þurrkast út í næstu kosningum sem og varð. Þessi afglöp hennar greiddu Framsóknarflokknum leið.
