Það er í senn áhugavert og ógnvekjandi að lesa umsagnir sumra trúarleiðtoga og annarra trúaðra einstaklinga um hin ýmsu þingmál. Nú síðast umsagnir vegna fyrirhugaðra breytinga á lögum um þungunarrof. Þetta fólk byggir afstöðu sína algjörlega á trúarsannfæringu sinni.
Vitaskuld er það sjálfsagður réttur allra að hafa sínar skoðanir og byggja þær á trú eða kreddum þeirra trúarbragða sem þeir aðhyllast. Um leið er ekki í lagi að ætlast til þess að landslög séu byggð á slíkum kreddum.
Það má aldrei gerast að þingmenn semji lög út frá trúarlegum forsendum. Siðmennt, félag siðrænna húmanista á Íslandi, varar við slíkri lagasetningu í nýlegri umsögn sinni.
Lög landsins verða að byggja á skynsemi, veraldlegri heimspekilegri íhugun og bestu vísindalegu þekkingu hvers tíma. Þannig byggjum við lýðræðislegt veraldlegt samfélag þar sem réttindi allra eru tryggð óháð trú eða annarri lífsspeki.
Veraldleg lög þvinga sjaldnast trúaða einstaklinga til að gera eitthvað sem trú þeirra bannar á meðan lög sem byggja á kreddum skerða iðulega réttindi annarra.
Mikilvægt er að við áttum okkur á því að einstaklingar sem vilja að landslög byggi á trú eru í raun að krefjast þess að trúræði ríki á Íslandi.
Skoða 2 athugasemdirFela athugasemdir
Mjög mikilvægt.
Þetta er vart að undra þ.e. hér eru í raun ríkistrúarbrögð og ríkiskirkja samkvæmt stjórnarskrá og hvoru tveggja styrkt af Alþingi og upphafið við hverja þess setningu. Ríkiskirkjan bauð hingað nýlega og heiðraði F. Graham) argasta forsprakka hinna andvísindalegu bókstafstrúarmanna BNA. DO sagðist á RÚV hafa horft á bókstafstrúar stöðina Omega “til að halda mig við kristnina”. Borgarstjóraefni xD fór þar í kosninga viðtal. — Frakkar aðskildu ríkið og allt trúarlegt 1905, en þeir hafa líka lengi verið með helstu menningar þjóðum.
