Skoðun » Nám

Próf, vinna og frí

Sigurður Hólm Gunnarsson — Fri, 08 Jun 2007 11:52:23 +0000

Eins og dyggir lesendur (sem varla eru fleiri en fjórir lengur) hafa tekið eftir hefur lítið verið að gerast á Skoðun – punktur – i – ess síðustu vikur. Ástæðan er ekki sú að ég hafi misst áhugann á að skrifa heldur einfaldlega mikið annríki. Eftir mikla próftörn, vinnu og loks frábært sumarfrí í Lanzarote (sem er ein Kanaríeyja) stefni ég að því að tjá mig oftar hér á þessum síðum. Ekki fyrir ykkur heldur fyrir mig. Það er nauðsynlegt að rífa kjaft af og til svo maður tapi ekki geðheilsunni.

Próf og lestrarjól

Sigurður Hólm Gunnarsson — Thu, 19 Jan 2006 14:56:12 +0000

Ég hef verið hrikalega latur við að uppfæra Skoðun síðustu misseri eins og lesendur hafa tekið eftir. Helsta ástæðan er sú að ég hef haft mikið að gera. Ég var til dæmis í prófum í desember sem ég þurftu að einbeita mér að. Eftir prófin notaði ég tímann vel til að lesa bækur sem ekki tengdust skólanum. Allt bækur sem ég mæli eindregið með.

Á fyrstu önninni í iðjuþjálfun (sem lauk nú um áramótin) var áfangi í heimspeki, eða öllu heldur siðfræði. Þetta voru stórskemmtilegir tímar sem að vöktu áhuga minn á að lesa meira um heimspeki. Ég varð mér því út um Utilitarianism eftir John Stuart Mill og nokkrar bækur eftir hinn umdeilda en skemmtilega heimspeking Peter Singer (Practical Ethics, Animal Liberation, Rethinking Life and Death og President of Good and Evil). Svo las ég nýjustu bók Al Franken – The Truth.

Þetta eru allt mjög áhugaverðar bækur. Ég mæli eindregið með Practical Ethics fyrir þá sem hafa áhuga á heimspeki. Hún er afar vel skrifuð og laus við allt jargon og formlegheit. Hver sem er, sem kann ensku vitaskuld, getur lesið þessa bók og haft gaman af. Að sama skapi mæli ég með President of Good and Evil og The Truth fyrir þá sem hafa gaman að lesa um bandarísk stjórnmál. Al Franken (The Truth) fjallar um Bush og félaga á kómískan máta á meðan Peter Singer (President of Good and Evil) skrifar um siðferði Bandaríkjaforseta (sem ekki er upp á marga fiska).

Á náttborðinu mínu liggja nú enn fleiri bækur sem bíða eftir því að verða lesnar. Þar á meðal flestar bækurnar eftir líffræðinginn Richard Dawkins sem er væntanlegur á trúleysisráðstefnuna sem haldinn verður í Reykjavík í sumar. Er reyndar byrjaður að lesa The Blind Watchmaker (aftur, las hana fyrir löngu) og er hún frábær.

Aðrar bækur sem ég bíð spenntur eftir að lesa eru Ideal Code, Real World : A Rule-Consequentialist Theory of Morality (heimspeki) og The End of Faith: Religion, Terror, and the Future of Reason sem fjallar meðal annars um þátt trúarbragða í hryðjuverkum.

Í stjórn Eirar

Sigurður Hólm Gunnarsson — Thu, 08 Sep 2005 16:41:40 +0000

Valdafíkn mín er engum takmörkum háð. Ég er búinn að búa á Akureyri í um tvær vikur og er strax búinn að troða mér í stjórn norðlenskra félagasamtaka. Í gær var ég kosinn í stjórn Eirar, félags heilbrigðisfræðinema við Háskólann á Akureyri. Reyndar fékk ég rússneska kosningu, enda bauð sig enginn annar fram. Það er kannski ofsögum sagt að ég hafi boðið mig fram. Réttar er að segja að ég hafi verið boðinn fram. Ég þorði bara ekki að segja nei. Hver getur sagt nei við húsfylli af kvenmönnum? Augljóslega ekki ég! Ekki er ég samt að kvarta, þetta verður örugglega mjög gaman.

Iðjuþjálfun á Akureyri

Sigurður Hólm Gunnarsson — Fri, 26 Aug 2005 15:31:58 +0000

Kæru lesendur. Eins og þið hafið eflaust orðið vör við þá hefur skodun.is ekki verið uppfærð um alllangt skeið. Ástæðurnar eru ýmsar en þó helst utanlandsferðir og nú síðast flutningar til Akureyrar. Eftir að hafa starfað í um ár sem aðstoðarmaður iðjuþjálfa við geðdeild LSH ákvað ég að skella mér í nám til Akureyrar, en Háskólinn á Akureyri er eini staðurinn sem kennir iðjuþjálfun á Íslandi. Stefni ég að því að uppfæra Skoðun reglulega áður en langt um líður.

Sjá:
Iðjuþjálfun við HA

http://www.unak.is/template1.asp?PageID=307