Reynsla mína af heimsóknum kínverskra ráðamanna er ekki góð og því nauðsynlegt að minna fólk á hvernig Ísland breyttist í alræðisríki bæði árið 2000 og 2002.

Li Peng
Þegar kínverski leiðtoginn Li Peng kom til landsins í september 2000 breytist landið okkar skyndilega í alþýðulýðveldið Ísland og yfirvöld virtust taka upp stjórnarhætti Kínverja, svona til að þóknast gestinum.

Sem dæmi girti lögreglan af heila íbúðarblokk í Fellahverfinu í Breiðholti svo að Li Peng gæti heimsótt það sem hann kallaði „venjulega“ íslenska fjölskyldu. Til þess að það væri hægt þurfti reyndar að setja alla aðra íbúa sem bjuggu í sama stigagangi í stofufangelsi á meðan. Þeir fengu ekki að fara heim til sín, fengu ekki að hitta Li Peng og það sem alvarlegast var þá gátu íbúarnir ekki flúið eigið heimili á meðan heimsókninni stóð.

Nánar um teboð Li Pengs í Breiðholtinu hér:  Lærdómsríkt ferðalag

Jiang Zemin
Í júní 2002 kom Jiang Zemin, þáverandi leiðtogi Alþýðuveldisins Kína og yfirmaður Li Peng, í ekki síður skrautlega heimsókn. Í þetta sinn kom einnig töluverður fjöldi iðkenda úr sértrúarhreyfingunni Falun Gong til landsins til að mótmæla því að hreyfingin er bönnuð í Kína. Yfirvöld í Kína, og skósveinar þeirra hér á Íslandi, nánast sturluðust af ótta við fyrirhuguð friðsæl mótmæli. Reynt var að koma í veg fyrir að Falun Gong meðlimir kæmust til landsins með ýmsum hætti. Lögregla send á flugvelli til að fylgjast með ferðum þeirra. Svokallaður svartur listi útbúinn með nöfnum mótmælenda sem flugfélögin áttu að stoppa og ýmislegt fleira var gert sem tíðkast í einræðisríkjum. Sem dæmi þá voru þeir 75 Falun Gong meðlimir sem þó komust til landsins vistaðir í nauðungarbúðum í Njarðvíkurskóla. (Ágæt umfjöllun um þessa sögu er að finna á Eyjunni: Falun Gong-málið rifjað upp)

Sem betur fer blöskraði flestum Íslendingum þessi meðferð og fjölmargir (þar á meðal ég) lögðu leið sína til Njarðvíkur þar sem þess var krafist að  fólkinu yrði sleppt.

Mótmælin við Perluna
Margir tóku sig saman og mótmæltu friðsamlega á Austurvelli, við Arnarhólinn, við stjórnarráðið, við kínverska sendiráðið og einnig við Perluna.

Jiang Zemin var boðaður til hátíðarkvöldverðar í Perluna og þótti mörgum tilvalið sýna Falun Gong meðlimum stuðning með því að mæta þangað og mótmæla. Nokkrir mótmælendur (um 10 manns) komust að því hvenær Jiang Zemin ætlaði að mæta í veisluna og voru því mættir fyrir utan með skilti. 22 lögreglumenn voru þá á staðnum og gerðu allt til að koma í veg fyrir að einræðisherrann yrði svo lítið sem vitni að mótmælunum. Allt var gert til að beinlínis fela okkur.  Ég var með spjald sem á stóð „Aðgát skal höfð í nærveru sálar“ og mynd af Tiananmen manninum.

Ljóst var frá upphafi að Zemin mátti alls ekki sjá þetta spjald. Þegar lögreglan gat ekki myndað nægjanlega góða skjaldborg í kringum okkur var fyrst lagður jeppi fyrir framan okkur til að við sæjumst ekki. Þegar það gekk ekki upp var fengin heil rúta.  Að lokum elti lögreglumaður (geri ég ráð fyrir) mig á bíl á meðan ég gekk fram og til baka með skiltið mitt fram hjá öllum fyrirstöðunum. Það endaði nánast með ósköpum þegar maðurinn keyrði á annan mótmælanda (engin slasaðist sem betur fer).

Mótmælin voru að öllu leyti friðsamleg. Engin læti. Það var einfaldlega ljóst að leiðtogi Alþýðuveldisins mátti alls ekki sjá að neinn var að mótmæla. Tjáningarfrelsið á Íslandi var fótum troðið þessa daga.

Nánar um mótmælin við Perluna:  Yfirlýsing vegna aðgerða lögreglu við Perluna þann 14. júlí 2002

Að lokum
Lagt hefur verið til að Falun Gong verði beðið opinberlega afsökunar á framferði íslenskra stjórnvalda og styð ég það heilshugar. Framganga yfirvalda var til háborinnar skammar.

Skal tekið fram að fjöldamargir íslenskir borgarar báðu Falun Gong sérstaklega afsökunar fyrir hönd ríkisins.

—–

TENGLAR
Nánar um Falun Gong mótmælin og Jiang Zemins  (skodun.is):
Yfirlýsing vegna aðgerða lögreglu við Perluna þann 14. júlí 2002
Sögulegur dagur í máli og myndum
Voru aðgerðir lögreglu löglegar? 

Myndir sem ég tók af mótmælunum

Þegar Li Peng kom í heimsókn (skodun.is):
Lærdómsríkt ferðalag

Umfjöllun á kínversku og myndir frá mótmælunum:
http://www.aboluowang.com/news/data/2008/1012/article_61056.html

Eyjan.is:
Falun Gong-málið rifjað upp: Stjórnvöld fóru í einu og öllu eftir skipunum Kínverja – Margt óupplýst

Visir.is:
Stjórnvöld munu ekki koma í veg fyrir mótmæli

Mbl.is
Iðkendur Falun Gong verði beðnir afsökunar

Við biðjumst afsökunar!
(Smellið til að sjá stærri mynd)

Hverju er verið að mótmæla?
Ríkisstjórninni? Er hrun bankakerfisins, krónan, atvinnuleysið, verðbólgan, spillingin og skuldir heimilanna núverandi ríkisstjórn að kenna? Hvernig? Nú má ekki lengur minnast á það að Jóhanna og Steingrímur tóku við landinu í rúst eftir efnahagshrun sem seint verður hægt að klína á vinstrimenn. „Það eru mörg ár síðan“ segja sumir mótmælendur og krefjast þess að allt verði lagað þegar í stað. Hægrimenn í atvinnulífinu krefjast þess að ríkisstjórnin reddi málunum strax og vinstrisinnaðir mótmælendur líka.

Margir gera sér þó grein fyrir að ástandið er ekki núverandi ríkisstjórn að kenna en gagnrýna þó að uppbyggingin gangi ekki nógu hratt. Það kann vel að vera og þar sem að ég er fullviss um að fólkið sem situr á Alþingi er ekki fullkomnara en annað fólk þá veit ég að mistök hafa verið gerð. Því er mikilvægt að benda á þau mistök og sýna yfirvöldum aðhald með málefnalegri gagnrýni og aðhaldi. Mér finnst ekki nóg að hrópa „þið eruð ekki að standa ykkur nógu vel, fíflin ykkar“ og „ég vil eitthvað annað“. Bara „EITTHVAГ annað.

„Ég vil kosningar!“ – Hvað á að kjósa og hvers vegna? Hvers vegna er stjórnarandstaðan betri? Og hvers vegna í ósköpunum er „eitthvað annað“ betra?

Ógeðsleg orðræða
Netið getur verið frábær vettvangur fyrir gagnlegar umræður og gagnrýni en gubbið sem frussast út úr fólki á hinum ýmsu netmiðlum er vægast sagt ógeðfellt. Skoðum nokkrar athugasemdir á vefmiðlum sem settar hafa verið á vefinn í dag (ég nenni ekki að taka saman allar Facebook athugasemdir þar sem menn eru kallaðir „fífl“, „hálfvitar“, „aumingjar“, „þjóðernissvikarar“ o.s.frv.):

„…um Orðhengil og Heimaskítsmátsdrottningu íslenska“ lýðveldisins“?“

„Óttalegur vesalingur ertu maður, en svona eru nú einu sinni vinstri grænir, ótrúlegir aumingar og vesalingar upp til hópa. eitthvað sem maður mundi kalla mannleg úrhrök,“

„Þvílíkur aumingi, þessum vesalingum þarna er best líst með því að geta ekki staðið af sér eitt andskotans hænuegg!“

„Smafylkingar liðið fer í fýlu ef það er púað á þetta prumpu lið“

„Sódóníska raðlygarann Jóhrannar erkisauð.“

„Fullt egg hitti tómann haus. (hátt bylur í tómri tunnu)“

„efast um að það sé hægt að skemma nokkuð í þessum haus eða öðrum í kollegum hans…“

Minni reiði og meira knús
Þessi ókurteisi, ofsafengna reiði og ósanngjörnu kröfur gera ekkert gagn. Við munum aldrei komast upp úr þessari kreppu nema með gagnrýnu hugarfari, málefnalegri umræðu og yfirveguðum aðgerðum.  Má ég leggja til minni reiði og meira knús?

Þetta eru önnur viðbrögð en atvinnumótmælendur sem ekki eru með meirapróf eiga að venjast. Skemmst er að minnast aðgerða lögreglu gagnvart atvinnuhippunum sem mótmæltu Kárahnjúkavirkjun. Þeim var ekki boðið neitt neftóbak. Þeir voru hundeltir um landið, stöðvaðir, yfirheyrðir og handteknir.

Mér er það einnig minnisstætt þegar ég tók þátt í mótmælum vegna komu kínverska einræðisherrans Jiang Zemins. Fjöldi meðlima Falun Gong var settur í stofufangelsi út á landi fyrir það eitt að vera á móti alræðisvaldinu í Kína og klæðast gulum búningum. Þó meðlimir Falun Gong séu upp til hópa trúarofstækismenn sem afneita þróunarkenningunni (ekki ósvipað íslenskum hægrimönnum sem telja kenninguna um hlýnun Jarðar vera alheimssamsæri) þá taldi ég ólýðræðislegt að hneppa þá í varðhald.

Ég tók þátt í friðsamlegum mótmælum við Perluna þar sem ráðamenn Íslands buðu Jiang Zemin í mat og karokee (Zemin söng fyrir gesti). Lögreglan bauð mér hvorki í nefið né vinalegt spjall. Hún var of upptekin við að leggja lögreglubílum og rútum fyrir framan mótmælendur til að tryggja að alræðisherrann frá Kína þyrfti ekki að horfa á mótmælin.

Þannig hélt ég á skilti sem á stóð ,,Aðgát skal höfð í nærveru sálar” og fyrir neðan var mynd af Tiananmen manninum. Þetta þótti lögreglunni greinilega mjög hættulegt og ógna almannafriði því allan tímann sem ég var þarna elti lögreglumaður mig á bíl þeim tilgangi einum að skyggja á skiltið. Hann keyrði áfram og bakkaði til skiptis eftir því í hvaða átt ég gekk. Lögreglumaðurinn var svo upptekinn við að koma í veg fyrir þessi mótmæli mín að hann keyrði á annan mótmælanda í öllum æsingnum. Nánari lýsing á þessum atburðum er að finna hér.

Semsagt, af viðbrögðum lögreglu að dæma telur hún skilti með slagorðum hættulegra en stöðvun helstu umferðaæða í Reykjavík. Merkilegt.

Nú get ég alveg skilið andstöðu fólks við náttúruspjöll og ég hef samúð með þeirri skoðun að tekjur einstaklinga eigi að vera einkamál. Það sem ég skil ekki er að nokkrum manni þyki þessi mál vera þess eðlis að nauðsynlegt sé að fara í rótækar mótmælaaðgerðir. Fyrir mér er svo margt alvarlegra í okkar samfélagi.

Af hverju eru nánast engin fjöldamótmæli gegn aðbúnaði aldraðra á Íslandi. Af hverju eru ekki reglulega skrílslæti á götum úti til að mótmæla biðlistum hjá Barna og unglingageðdeild? Af hverju hlekkjar enginn sig við anddyri fjármálaráðuneytisins til að mótmæla óráðsíu stjórnvalda? Hvar eru öll mótmælin í Kringlunni (musteri Mammons) gegn fátækt barna og skorti á tannlæknaþjónustu?

Með öðrum orðum velti ég því fyrir mér hvers vegna sum mál (umhverfismál og skattframtöl) vekja upp gífurlegar tilfinningar og viðbrögð á meðan önnur mál (sem ég tel í það minnsta jafn mikilvæg) virðast ekki hafa nein sérstök áhrif á atvinnumótmælendur Íslands. Hefur einhver svör við þessu?

Sjá nánar:
Yfirlýsing vegna aðgerða lögreglu við Perluna þann 14. júlí 2002
Sögulegur dagur í máli og myndum

Undirritaður var í afar fámennum hópi þeirra sem var við Perluna þegar harðstjórinn kom þangað í fylgd lögreglu. Mótmælendur voru um 10 þar sem undirritaður var en hins vegar voru 22 lögreglumenn á svæðinu frá sjónarhorni undirritaðs.

Sá sem þetta skrifar hélt á stóru spjaldi þar sem á stóð ,,Aðgát skal höfð í nærveru sálar” og fyrir neðan var mynd af Tiananmen manninum sem stöðvaði einn síns liðs skriðdrekasveit á Torgi hins himneska friðar árið 1989. Lögreglan, eða undirmenn Zemins (oft var erfitt að greina þar á milli), sáu sig tilneydda til að leggja jeppa í veg fyrir mótmælin (sjá: Mynd 1) en þegar þeir sáu að hann skyggði ekki nógu vel á skilaboð okkar var heil rúta lögð fyrir framan okkur (sjá: Mynd 2).

Ólíkt því sem lögreglan segir hafði þessi gjörningur EKKERT með öryggi Jiang Zemins að gera heldur var þetta einungis gert til þess að koma í veg fyrir að hann yrði vitni að gagnrýni. Enda óvenju viðkvæmur fyrir slíku.

Þegar matarboði morðingjans var lokið höfðu mun fleiri mótmælendur safnast saman fyrir utan Perluna og mun fleiri skilti og borðar voru á svæðinu. Þá mætti lögreglan með alla stóru lögreglubílana sína og lagði í veg fyrir mótmælendur til að skyggja á okkur. Þeir geta kannski, hugsanlega, réttlætt að þarna hafi þeir verið að tryggja öryggi Zemins. En sama má ekki segja um þegar þeir lögðu rútu í veg fyrir okkur við komu hans.

Þegar Zemin var farinn frá Perlunni gekk undirritaður meðfram veginum að Perlunni með ofangreint skilti (sjá: Mynd 3). Allan þann tíma elti lögreglumaður mig á bíl (sjá: Mynd 4) í þeim tilgangi einum að skyggja á skiltið. Það voru tugir lögreglumanna á gangi við hliðina á mér þannig að ekkert öryggi var frekar tryggt með þessari aðgerð. Lögreglumaðurinn fór áfram þegar ég gekk áfram og hann setti snarlega í bakkgír ef ég ákvað að ganga til baka. Hann var í raun svo upptekinn við að elta mig að hann keyrði á annan mótmælenda (sem sakaði ekki sem betur fer).

Ég hvet allt fjölmiðlafólk til að spyrja lögreglu nánar út í þessi atriði því það sem kom fram í fréttatíma Ríkissjónvarpsins stenst ekki skoðun.

Sjá nánar:
Sögulegur dagur í máli og myndum
Voru aðgerðir lögreglu löglegar? 

Sjá nánar:
Yfirlýsing vegna aðgerða lögreglu við Perluna þann 14. júlí 2002
Voru aðgerðir lögreglu löglegar? 

Áhrif Li Pengs eru mikil
Eins og allir þeir sem fylgdust með fréttum í gær vita þá skrapp Li Peng og frú í heimsókn til fjölskyldu í Breiðholtinu í gær. Forsaga þessarar heimsóknar er sú að Li Peng þóttist vera forvitinn um hag íslenskrar alþýðu og vildi þess vegna heimsækja einhverja ,,venjulega“ íslenska fjölskyldu. Íslensk stjórnvöld brugðu því á það ráð að girða af heila íbúðarblokk í Fellahverfinu þannig að enginn komst hvorki inn né út úr því hverfi. Það sem meira er þá fengu þeir íbúar sem bjuggu í sama stigagangi og gestgjafar Pengs ek

ki að líta fjöldamorðingjann augum né, það sem mikilvægara er, að forða sér út úr blokkinni. Hvernig íslensk stjórnvöld ætluðu sér að varpa réttu ljósi á hag íslenskrar alþýðu með þessum fantaskap er mér gjörsamlega hulin ráðgáta.

Ég hlýt að spyrja hver réttur stjórnvalda sé að meina ,,íslenskri alþýðu“ frjálsan aðgang að eigin heimili. Er þetta löglegt? Getur íslenska ríkið boðið alræmdum fjöldamorðingja í heimsókn til nágranna míns án þess að ég geti nokkuð gert í því? Hefur lögreglan rétt til þess að setja nokkurn mann í stofufangelsi á eigin heimili í þeim tilgangi einum að trufla ekki teboð erlends fjöldamorðingja?

Íslensk stjórnvöld tryggðu Li Peng mjög öfluga löggæslu því líklegast voru í kringum 50 lögreglumenn auk sérsveitarmanna og hunda að vernda Peng þegar mest var. Nú er ekkert nema eðlilegt að stjórnvöld tryggi gestum sínum öfluga vernd gegn íslenskum hryðjuverkamönnum en hvað gerðu stjórnvöld til að tryggja réttindi þegna sinna? Ekki neitt. Þvert á móti tóku íslensk stjórnvöld upp einræðisleg vinnubrögð Li Pengs og félaga og tróðu á réttindum hins almenna borgara.

Ég svo sannarlega vona að þeir Breiðhyltingar sem voru settir í tímabundið stofufangelsi í gær leiti réttar síns og kæri stjórnvöld fyrir frelsisskerðingu. Þessi siðlausi fantaskapur stjórnvalda getur einfaldlega ekki verið löglegur.