Um mótmæli og ógeðslega orðræðu
Höfundur: Sigurður Hólm Gunnarsson
Efnisorð: Mótmæli, Stjórnmál
Viðbrögð: Ummæli (
Nú hef ég nokkrum sinnum tekið þátt í mótmælum og ég hef margoft tjáð mig opinberlega um þjóðfélagsmál. Ég hef þó aldrei öskrað, kastað eggjum eða öðru lauslegu og aldrei heimtað „bara eitthvað annað“. Það er að mínu viti lágmarkskrafa að fólk, sem vill láta taka sig alvarlega, rökstyðji skoðanir sínar og hlusti á málflutning annarra en hegði sér ekki eins og heimtufrekir og óþekkir krakkar.
Hverju er verið að mótmæla?
Ríkisstjórninni? Er hrun bankakerfisins, krónan, atvinnuleysið, verðbólgan, spillingin og skuldir heimilanna núverandi ríkisstjórn að kenna? Hvernig? Nú má ekki lengur minnast á það að Jóhanna og Steingrímur tóku við landinu í rúst eftir efnahagshrun sem seint verður hægt að klína á vinstrimenn. „Það eru mörg ár síðan“ segja sumir mótmælendur og krefjast þess að allt verði lagað þegar í stað. Hægrimenn í atvinnulífinu krefjast þess að ríkisstjórnin reddi málunum strax og vinstrisinnaðir mótmælendur líka.
Margir gera sér þó grein fyrir að ástandið er ekki núverandi ríkisstjórn að kenna en gagnrýna þó að uppbyggingin gangi ekki nógu hratt. Það kann vel að vera og þar sem að ég er fullviss um að fólkið sem situr á Alþingi er ekki fullkomnara en annað fólk þá veit ég að mistök hafa verið gerð. Því er mikilvægt að benda á þau mistök og sýna yfirvöldum aðhald með málefnalegri gagnrýni og aðhaldi. Mér finnst ekki nóg að hrópa „þið eruð ekki að standa ykkur nógu vel, fíflin ykkar“ og „ég vil eitthvað annað“. Bara „EITTHVAГ annað.
„Ég vil kosningar!“ – Hvað á að kjósa og hvers vegna? Hvers vegna er stjórnarandstaðan betri? Og hvers vegna í ósköpunum er „eitthvað annað“ betra?
Ógeðsleg orðræða
Netið getur verið frábær vettvangur fyrir gagnlegar umræður og gagnrýni en gubbið sem frussast út úr fólki á hinum ýmsu netmiðlum er vægast sagt ógeðfellt. Skoðum nokkrar athugasemdir á vefmiðlum sem settar hafa verið á vefinn í dag (ég nenni ekki að taka saman allar Facebook athugasemdir þar sem menn eru kallaðir „fífl“, „hálfvitar“, „aumingjar“, „þjóðernissvikarar“ o.s.frv.):
„…um Orðhengil og Heimaskítsmátsdrottningu íslenska“ lýðveldisins“?“
„Óttalegur vesalingur ertu maður, en svona eru nú einu sinni vinstri grænir, ótrúlegir aumingar og vesalingar upp til hópa. eitthvað sem maður mundi kalla mannleg úrhrök,“
„Þvílíkur aumingi, þessum vesalingum þarna er best líst með því að geta ekki staðið af sér eitt andskotans hænuegg!“
„Smafylkingar liðið fer í fýlu ef það er púað á þetta prumpu lið“
„Sódóníska raðlygarann Jóhrannar erkisauð.“
„Fullt egg hitti tómann haus. (hátt bylur í tómri tunnu)“
„efast um að það sé hægt að skemma nokkuð í þessum haus eða öðrum í kollegum hans…“
Minni reiði og meira knús
Þessi ókurteisi, ofsafengna reiði og ósanngjörnu kröfur gera ekkert gagn. Við munum aldrei komast upp úr þessari kreppu nema með gagnrýnu hugarfari, málefnalegri umræðu og yfirveguðum aðgerðum. Má ég leggja til minni reiði og meira knús?
Miið rétt – ofsin og heiftin í dag hafa verið óhugnanleg á neitinu. Meðan svo er miðar okkur ekkert áfram.
Kveðja að norðan.
Já, það gekk nefnilega svo LJÓMANDI VEL að brosa og heilsa og segja að allt færi áreiðanlega á besta veg ef yfirvaldið fengi að ráða.
Nú skal ég nota nokkur hugtök og segja þér nákvæmlega hversvegna fólk notar þau.
Þessir HUGLEYSINGJAR í ríkisstjórninni, en hún vann til þess titils með vettlingatökum á fjármálastofnununum sem semja fyrir hana frumvörpin rétt eins og fyrri ríkisstjórnir, geta enn lamið í sig dug og tekist á við vandann beint. Hugsið ykkur að LIÐLESKJAN sem við höfum fyrir forsætisráðherra setji fyrir sig nú í dag, daginn sem við komum til hennar 34.000 undirskriftum með áskorunum um afnám verðtryggingarinanr, stjórnarskrárákvæði um eignarrétt kröfuhafa til að sjálfkrafa fella þessa kröfu.
Er eignarréttur semsé ekki tryggður í neinu landi nema tveimur – Íslandi og einu öðru – eða er forsætisráðherrann HUGLAUS og tekur ekki undir með sjálfri sér í þeim 3 frumvörpum sem hún flutti úr stjórnarandstöðu um niðurfellingu hennar. HÚN talar duginn úr fólki, ÞÚ hvetur fólk til þess að missa kjarkinn.
Það er ekkert að því að kalla hugleysingja hugleysingja og liðleskjur liðleskjur. Jóhanna gæti eins verið með mynd af sér við hliðina á orðinu í orðabók, slík liðleskja er hún og hennar lið. Hún á auðvitað að MUNA það sem hún ÁÐUR sagði, og það sama gildir um hennar lið.
Hvað annað á að taka við? Hverjir „aðrir“ eiga að stjórna landinu? Það er svo sannarlega ekki fyrir traustinu að fara á stjórnarandstöðunni, ef það skyldi hafa farið framhjá þér og því úrtöluliði sem á eitthvað annarlegt undir að draga kjark og baráttuviljann úr fólki. Heldurðu að þú sért að hvetja til kurteisi? Þú hvetur til áframhaldandi sinnuleysis og lýsir þig fylgjandi því að þingmenn komist áfram upp með að hlusta á kurteisleg orð og halda svo áfram því sama og þeir hafa alltaf gert – Að hundsa þau.
Þetta er óþokkalegur niðurrifspistill hjá þér með því að stuðla að sinnuleysi og kalla það kurteisi.
Rúnar:
1) Ertu að gefa í skyn að eignarétturinn komið málinu ekki við eða að Jóhann eigi að brjóta lög?
2) Ég veit ekki betur en að Jóhanna sé enn á móti verðtryggingunni og vilji finna löglegar leiðir til að afnema hana. Er það rangt?
3) Er gagnlegt að væna alla þá sem gera ekki allt það sem þú vilt strax um HUGLEYSI (með stórum stöfum)?
4) Ég hvet til gagnrýnis hugarfars, málefnalegrar umræðu og yfirvegaðra aðgerða. Ef þú vilt uppnefna slíka hvatningu sem niðurrif og sinnuleysi þá þú um það.