Slúðurkenndar umsagnir Reynis
Höfundur: Sigurður Hólm Gunnarsson
Efnisorð: Atvinnu- og efnahagsmál, Fjölmiðlar, Ritskoðun
Viðbrögð: Ummæli (
Reynir Traustason, blaðamaður á Fréttablaðinu, mætti Andrési Magnússyni í Ísland í bítið á Stöð 2 í morgun til að ræða pistil Andrésar, sem var birtur í Morgunblaðinu í morgun, um meinta ritskoðun Jóns Ásgeirs Jóhannessonar á ritum sínum. Reynir sagði umfjöllun Andrésar um reynslu mína af ritskoðun á Vísi vera bæði slúðurkennda og loftkennda. Þessi skoðun rannsóknarblaðamannsins er vægast sagt undarleg þegar litið til þess að vitnisburður minn er bæði studdur af óvéfengjanlegum heimildum og nafngreindum vitnum.
Ef það sem ég segi í greinum mínum „Er Fréttablaðið ritskoðað„, „Áfram um ritskoðun“ og í viðtölum mínum við blaðamenn er „slúðurkennt“ eða „loftkennt“ þá hlýtur það sama að eiga við margar þær fréttir sem Reynir hefur skrifað í gegnum tíðina. Í sumum tilfellum er fréttaflutningur Reynis reyndar bæði loftkenndari og slúðurkenndari en frásögn mín því sumar fréttir hefur hann byggt á nafnlausum heimildarmönnum og gögnum sem enginn veit hvernig hann fékk í hendur. Í umfjöllun minni um ritskoðun á Vísi hef ég bæði bent á heimildir og nafngreind vitni.
Í Íslandi í býtið sagði Reynir:
„…sumt er óljóst og slúðurkennt eins og hvað var tekið út af Vísi. Hver sagði Sigurði Hólm að taka þaðan út [...] Er Jón Ásgeir þar ritstjóri?“
og
„…það er svona álíka loftkennt og það sem þú ert að tala um Vísi. Þú veist ekki alveg hvað þetta er, en þú veist að það gerðist eitthvað voðalegt…“
Þetta er einfaldlega rangt hjá rannsóknarblaðamanninum (sem aldrei hefur haft fyrir því að rannsaka þetta mál, t.d. með því að hafa samband við undirritaðan). Það er ekkert óljóst og ekkert sem ég segi er byggt á slúðri. Það er alveg ljóst hver vildi taka umrædda frétt út. Því starfsmenn Vísis fengu sendan póst frá yfirmanni þar sem eftirfarandi kom fram: „Jón Ásgeir hafði samband og biður um að frétt sé eytt vegna þess að fréttin er röng.“ Ég á þennan tölvupóst og er ekki sá eini sem á hann því allir starfsmenn Vísis fengu þessi skilaboð.
Þar að auki hefur samstarfsmaður minn á Vísi tekið undir hvert eitt og einasta orð sem ég hef sagt um þessa ritskoðun:
„Ég starfaði á Vísir.is á umræddu tímabili og get staðfest allt sem komið hefur fram hjá Sigurði Hólm. Auk þess eru það hreinir útúrsnúningar að hann hafi látið nota sig, hann neitaði að eyða umræddri frétt en aðrir aðilar gerðu það. Ég starfaði á vísir.is á tímabilinu janúar til júní á þessu ári. Ég kom fremur lítið að almennum fréttum og lenti ekki sjálfur í ritskoðun. En á þessu tímanbili komu upp tvö tilvik þar sem fréttum var eytt með þeim hætti sem Sigurður lýsir, hann átti í hlut í öðru tilvikinu en annar blaðamaður varð fyrir þessu skömmu áður. Ég tek fram að ég átti í ágætu samstarfi við eigendur Vísis á þessum tíma, kunni því vel að vinna fyrir þá og hef ég sjálfu sér ekkert upp á Baug að klaga. En það breytir ekki því að þetta gerðist, ritskoðun var beitt a.m.k. tvisvar á þessu stutta tímabili og mér er tjáð að það hafi gerst a.m.k. einu sinni áður.“ - Ágúst Borgþór Sverrisson
Ég vil því leyfa mér að gagnrýna Reynir Traustason harðlega fyrir að reyna að gera lítið úr ummælum mínum. Gagnrýni Reynis er ekki byggð á neinum staðreyndum eða rannsóknum af hans hálfu. Í raun má segja að ummæli hans séu bæði loft- og slúðurkennd.
Ástæðan fyrir því að ég ákvað að skrifa um þessi mál var sú að mér (og öðrum) blöskraði þessi ritskoðun og mér fannst eðlilegt að almenningur vissi af henni. Reynir Traustason, rannsóknarblaðamaður, ætti að vera sömu skoðunar því hann veit að ef það er eitthvað sem dregur úr trúverðugleika fréttamiðla þá er það þegar þeir eru ritstýrðir af eigendum sínum.
Ágæti Sigurður Hólm!
Ég veit ekki hver þú ert og hef engar forsendur til að meta sannleiksgildi þinna frásagna og þar með af og frá að ég segi þær vera slúður.
Ef þú hefur hlustað á þessar umræður í gærmorgunn þá ættirðu að gera þér grein fyrir að ég var að tala um þekkingarleysi Andrésar Magnússonar, þjóðþekkts álitsgjafa og meints blaðamanns, á málinu. Ég vildi vita frá honum hvaða fréttum hafi verið hent út af Vísi og með hvaða hætti títtnefndur Jón Ásgeir hefði komið að því máli og að ritstjórn Vísis. Það var grein Andrésar sem var í senn loft- og slúðurkennd en sú einkunn á ekki við um þá sem um var rætt. Það sem að mér snýr í greininni er hreinn og endurtekinn rógur um að Baugaur sjái mér fyrir gögnum.
Hafi þér verið misboðið af Baugsmönnum þá er það þitt mál en snýr engan veginn að minni vinnu á Fréttablaðinu þótt þú hafir látið í veðri vaka að við hljótum að sæta sömu meðferð og þú. Hér er leitast við að halda í heiðri gildi góðrar blaðamennsku.
Reynir Traustason
PS. Til gamans væri fróðlegt að vita hvaða greinum var hent út af Vísi.
Sæll Reynir,
„Ég veit ekki hver þú ert og hef engar forsendur til að meta sannleiksgildi þinna frásagna og þar með af og frá að ég segi þær vera slúður.“
Það er ágætt að heyra þetta, en af orðum þínum á Stöð 2 í gær að ráða varst þú þó þeirrar skoðunar. Þar segir þú beinlínis að það hafi verið „slúðurkennt“ hver bað um að fréttir yrðu teknar út. Það er bara ekki rétt.
Ég hlustaði vel á umræður ykkar Andrésar og eins þú ættir að vita hefðir þú lesið greinar mínar hér á Skoðun er ég sammála þér í flestum atriðum, ekki Andrési.
Auðvitað var mér misboðið af þeirri reynslu sem ég lenti í og ég treysti því að þér hefði verið það líka. Ég hef hins vegar enga vitneskju um að slík vinnubrögð hafi verið stunduð á Fréttablaðinu og tek það skýrt fram.
Það breytir því ekki að ég veit fyrir víst að fullyrðingar um að eigendur skipti sér aldrei að fréttum miðla sinna eru beinlínis rangar.
Athugasemdir af gefnu tilefni.
Andrés Magnússon vitnaði í ummæli mín hér á þessum vef í Morgunblaðsgrein sinni í gær. Þar kemur réttilega fram að ég hef staðfest frásagnir Sigurðar Hólm um að í nokkrum tilvikum hafi fréttum á visir.is um málefni Baugs verið eytt vegna kvartana frá Jóni Ásgeiri til þáverandi rekstraraðila Vísis, Femin PMf. Raunar er vitnisburður minn í málinu óþarfur þar sem Soffía Steingrímsdóttir, þáverandi ritstjóri Vísis og einn eigenda Femin PMf, hefur staðfest þetta í umfjöllun RÚV um málið síðastliðið haust.
Ég vil hins vegar taka fram að framlag mitt til þessarar umræðu takmarkast við þennan vitnisburð. Ég hef enga skoðun látið uppi um eignarhald á fjölmiðlun né lýst opinberlega yfir grunsemdum um ritskoðun á öðrum miðlum í eigu Baugs og skyldra aðila. Því síður hef ég opinberlega tortryggt vinnubrögð blaðamanna á þessum miðlum.- Fyrir utan það að hafa opinberað vitneskju mína í þessu tiltekna máli er ég enn sem komið er ekki þátttakandi í þessari umræðu. En vissulega er áhugavert að fylgjast með henni.
Hvort sem miðlum Jóns Ásgeirs er ritstýrt eða ekki er alveg klárt að umræðan mun alltaf vera í sama farinu að öllu óbreyttu. Þeir sem halda því fram að málið sé einfaldlega persónuárásir gegn Jóni Ásgeiri hafa rétt fyrir sér, enda á þetta ekki að vera neitt öðruvísi. Það skiptir einfaldlega máli hver á hvað, sérstaklega í jafn litlu samfélagi og við búum í. Ef Reynir Traustason ætti Frétt PMf. myndi enginn gera athugasemdir við það, enda hefði hann ekki annarra hagsmuna að gæta en að rekstur miðla sinna gengi vel.
Það er reyndar athyglisvert að velta því fyrir sér hvað Jón Ásgeir sér við þennan rekstur, jafn stórtækur og hann hefur verið undanfarin misseri getur varla verið að hann líti á þetta seem gullið viðskiptatækifæri, nema ef vera skildi óbeint, enda hefur hann sagt að tækifærin séu orðin lítil sem engin hér á landi.
Þegar jafn valdamikill maður í íslensku viðskiptalífi og Jón Ásgeir á í hlut, er eðlilegt að menn setji spurningamerki og athugasemdir við eignarhald hans á fjölmiðlum auk þess sem umfjöllun þessara miðla af málefnum félaga eða fyrirtækja honum tengdum verður alltaf dregin í efa hvort sem um ritstýringu er að ræða eða ekki. Blaðamönnum og ritstjórum Fréttar PMf. geta þess vegna ekki liðið vel með stöðu mála, vitandi að svona mun umræðan vera á meðan ekkert breytist.
Lagasetning í þessu sambandi er ekki skynsamleg, enda hlægilegt að setja lög sem beinast að tilteknum einstaklingi, en það breytir því ekki að umsvifum eins manns í viðskiptalífi svo lítillar þjóðar sem Ísland er, eru takmörk sett og hætt við að þau snúist uppí andhverfu sína ef of langt er gengið.
Að lokum legg ég til við Frétt PMf. að þeir gefi DV líkt og Fréttablaðið, enda hefur það sannað sig að er mun betra rekstrarform en að selja blaðið í smásölu og áskrift, a.m.k. samkvæmt upplýsingum sem Fréttar PMf.