Er Fréttablaðið ritskoðað?
Höfundur: Sigurður Hólm Gunnarsson
Efnisorð: Atvinnu- og efnahagsmál, Fjölmiðlar, Ritskoðun
Viðbrögð: 4 athugasemdir
Áhugaverð umræða var í Íslandi í dag í gærkvöldi vegna hugsanlegra kaupa eigenda Fréttablaðsins á hinu gjaldþrota DV. Margir hafa áhyggjur af því að eignarhald fjölmiðla sé að færast á of fáar hendur hér á landi. Mörg dæmi eru um það víðs vegar um heiminn að eigendur fjölmiðla misnoti vald sitt og því ekki óeðlilegt að gera ráð fyrir að slíkt hið sama gæti gerst á Íslandi.
Reynir Traustason, blaðamaður á Fréttablaðinu, fullyrti í gær að Jón Ásgeir hafi aldrei skipt sér af ritstjórn blaðsins. Ég myndi líklegast trúa Reyni ef ég vissi ekki af þeim afskiptum sem Jón Ásgeir hafði af ritstjórn www.visir.is á meðan sá vefur var enn á lífi.
Veit ég til þess að Jón Ásgeir skipaði blaðamönnum og yfirmönnum á Vísi að taka út ýmsar fréttir sem hann vildi ekki að yrðu birtar. Þó að blaðamenn (þar á meðal undirritaður) neituðu að fylgja þessum fyrirskipunum hurfu fréttirnar samt. Þegar blaðamenn kvörtuðu var einfaldlega sagt að hafa þyrfti í „huga hver eigandi miðilsins er“ áður en fréttir yrðu birtar.
Er það því skrítið að ég efist um hlutleysi eigenda Fréttablaðsins?
Það er víst ekki hægt að gera það ólöglegt að reka fréttamiðil í sinni eigu eins og áróðurspésa. En lausnin er einföld: ekki lesa fréttablaðið.
Annars eru fréttamiðlar ákaflega duglegir að standa vörð um hlutleysi hvers annars, því ef áróður eða lygar koma á einum þá gera hinir það sér að fréttamat. Það mætti jafnvel hafa eitthvað upp úr því að setja á fót hlutleysisvottunarþjónustu fyrir fréttamiðla eða jafnvel einstaka fréttamenn.
Það þarf auðvitað töluverðan kjark til að koma fram eins Sigurður Hólm og segjast vera lydda, hafa látið notað sig og segja sér fyrir verkum. Það er auðvitað til, því miður, en alger undantekning. Eigendur blaðanna nota ekki blaðamenn sína, jú nema lyddurnar sem engu þora og ekkert geta.
Skil reyndarvel að enginn vilji hafa þetta í vinnu, þar sem ekki er farið rétt með…visir er ekki sama og visir….. eigendaskipti hafa verið þar og ekki hægt að klína öllu neikvæðu sem þvælist um í sjúkum hugum á Fréttablaðið. Öfundin á sér margar biritingarmyndir, þetta rugl sjúks manns er ein þeirra.
Ekki man ég nú eftir því að hafa sagst hafa verið notaður. Ég benti einfaldlega á að fréttum hafi verið eytt þvert á vilja blaðamanna. Annars finnst mér áhugavert að maður sem vill ekki segja skoðun sína undir nafni kalli aðra „lyddu“. Auk þess er töluverð ókurteisi í því að væna fólk um geðsjúkdóma. Mundu það ip. 213.176.154.194
Ég starfaði á Vísir.is á umræddu tímabili og get staðfest allt sem komið hefur fram hjá Sigurði Hólm. Auk þess eru það hreinir útúrsnúningar að hann hafi látið nota sig, hann neitaði að eyða umræddri frétt en aðrir aðilar gerðu það. Ég starfaði á vísir.is á tímabilinu janúar til júní á þessu ári. Ég kom fremur lítið að almennum fréttum og lenti ekki sjálfur í ritskoðun. En á þessu tímanbili komu upp tvö tilvik þar sem fréttum var eytt með þeim hætti sem Sigurður lýsir, hann átti í hlut í öðru tilvikinu en annar blaðamaður varð fyrir þessu skömmu áður. Ég tek fram að ég átti í ágætu samstarfi við eigendur Vísis á þessum tíma, kunni því vel að vinna fyrir þá og hef ég sjálfu sér ekkert upp á Baug að klaga. En það breytir ekki því að þetta gerðist, ritskoðun var beitt a.m.k. tvisvar á þessu stutta tímabili og mér er tjáð að það hafi gerst a.m.k. einu sinni áður.