Lögð áhersla á markmið ekki leiðir
Höfundur: Sigurður Hólm Gunnarsson
Efnisorð: Hugmyndafræði, Ríkisumsvif
Viðbrögð: Ummæli (
Ef marka má umræður á landsþingi Samfylkingarinnar er margt sem bendir til þess að flokkurinn sé að færast í frjálsræðisátt. Í hátíðarræðu sinni sagði Össur Skarphéðinsson, formaður Samfylkingarinnar, að Samfylkingin væri markaðssinnaður flokkur sem jafnframt legði áherslu á jafnrétti og velferðarþjónustu til handa öllum.
Í ræðu sinni segir Össur meðal annars:
„Við erum flokkur samhjálpar en við erum líka markaðssinnaður flokkur. Samfylkingin þarf að skoða með opnum huga breytt rekstrarform í heilbrigðisþjónustunni, án þess að hróflað sé við jöfnu aðgengi allra óháð efnahag. Það þarf að láta markaðslögmálin vinna í þágu markmiða jafnaðarstefnunnar. Það er markmiðið sem skiptir máli en ekki leiðin að því. Ríkið þarf að vera kaupandi, en það þarf ekki í öllum tilvikum að vera seljandi.“
Ég fagna þessum orðum Össurar ákaft enda endurspegla þau sjónarmið sem ég hef staðið fyrir. Í grein minni „Frjálslyndur flokkur óskast“ segi ég til að mynda:
„Markmið eða leiðir?
Jafnaðarmenn í öllum flokkum eiga sér eina sameiginlega hugsjón. Hún er sú að allir hafi frjálsan aðgang að mennta-, heilbrigðis- og félagsþjónustu. Frjálslyndir jafnaðarmenn skera sig úr með því að leggja áherslu á þetta göfuga markmið en eru um leið reiðubúnir að reyna nýjar og framsæknar leiðir til að ná fram þessum markmiðum. Frjálslyndir jafnaðarmenn eru t.a.m. ekki sjálfkrafa andsnúnir einkarekstri eða aðkomu hins frjálsa markaðar að velferðarþjónustunni. Markmiðin eru ofar leiðunum og því eru jafnaðarmenn opnir fyrir að skoða allar þær leiðir sem leitt gætu til betra og skilvirkara velferðakerfis. Kreddufastar upphrópanir hugnast frjálslyndum ekki.“
Í lok sömu greinar segi ég:
„Meirihluti landsmanna telst til frjálslyndra jafnaðarmanna. Íslendingar vilja langflestir að yfirvöld veiti öllum aðgang að góðu mennta-, heilbrigðis- og félagskerfi en eru um leið flestir mótfallnir ofríki ríkisvaldsins og eru opnir fyrir nýjum hugmyndum og leiðum að settu markmiði.
Stjórnmálaástandinu á Íslandi í dag verður vart betur lýst en sem hugmyndafræðilegri eyðimörk þar sem íhaldsmenn allra flokka ráða lögum og lofum. Akur frjálslyndis er hins vegar að mestu óplægður og því er fullyrt hér að sá flokkur sem fyrstur verður til að boða raunverulega frjálslynda jafnaðarstefnu muni uppskera mikið fylgi meðal landsmanna. Mun meira en margan grunar.“
Ítarefni:
Hátíðarræða Össurar Skarphéðinssonar
Jám bráðum verður talað um miðjuflokkana þrjá, sjalla, samma og framma.