Klerkaveldið í Bandaríkjunum
Höfundur: Sigurður Hólm Gunnarsson
Efnisorð: Heimsmynd
Viðbrögð: Ummæli (
Fáum dylst að hinn kristni „móralski meirihluti“ ræður nú ríkjum í Bandaríkjum Norður Ameríku. Kristnir öfgasinnar eru við það að yfirtaka repúblíkanaflokk Bush og vísanir í Guð og önnur trúarstef verða sífellt algengri hjá stjórn hans. Nú síðast sagði William Boykins, yfirmaður leyniþjónustusviðs varnarmálaráðuneytis Bandaríkjanna, Bush vera kyndilbera Guðs sem ætti í hetjulegri baráttu við myrkraöfl Satans í löndum múslima.
Það hefur lengi valdið áhyggjum hve bókstafstrú er algeng um þessar mundir í löndum múslima. Vaxandi áhrif bókstafstrúarafla í Bandaríkjunum valda ekki síður miklum áhyggjum enda afar hættuleg þróun þegar öflugasta ríki heims tekur upp á því að réttlæta heimsvaldastefnu sína með tilvísunum í hinn „eina rétta guð“.
Í frétt Rúv um ofangreind ummæli Williams Boykins segir:
George Bush Bandaríkjaforseti er kyndilberi Guðs og berst hatrammri baráttu, ekki við Saddam Hussein og Osama bin Laden, heldur Satan sjálfan. Þetta eru ummæli Williams Boykins hershöfðingja, nýskipaðs yfirmanns leyniþjónustusviðs varnarmálaráðuneytis Bandaríkjanna, Pentagon.
Rannsóknarfréttamenn NBC sjónvarpsstöðvarinnar vestan hafs og stórblaðsins Los Angeles Times hafa grafið upp ýmiss ummæli hershöfðingjans sem er kristinn og heittrúaður eftir að hann var skipaður einn nánasti samstarfsmaður Donalds Rumsfelds varnarmálaráðherra. Boykins mun meðal annars stýra leitinni að Saddam og Osama bin Laden.
Á einni trúarsamkomu spurði Boykin hvers vegna Bush væri í Hvíta húsinu og benti á að meirihluti Bandaríkjamanna hefði ekki kjörið hann í embætti. Bush væri í Hvíta húsinu af því að Guð hefði sett hann þangað.
Í janúar sýndi hann babtistum í Flórída mynd af Mogadisjú, höfuðborg Sómalíu, og var svartur blettur á henni miðri. Boykin staðhæfði að bletturinn sannaði að myrkraöfl væru í borginni, Guð hefði sýnt sér djöfulinn, óvininn mikla.
Fréttaskýrendur segja aAMjúpanir fjölmiðlanna setja Bush í vanda, ekki síst vegna margra yfirlýsinga Boykins um að Guð Bandaríkjamanna væri Guð Biblíunnar, aðrir guðir, einkum þó Allah, væru skurðgoð og falsguðir.
Er það undarlegt að margir óttist nýtt tímabil krossfara og trúarátaka í heiminum?
Já þeir hafa verið hægt að auka við sig áhrifin trúarofstækismennirnir hjá GOP síðan Reagan var og hét. Það var eitt sinn að repúblikanar börðust allra helst fyrir minni ríkisumsvifum og lægri sköttum, og var enginn harðari í þeirri baráttu en Reagan. En hann var einnig ákaflega trúaður og það gaf trúarofstækinu innan flokksins byr undir báða vængi.
Það virðist vera að í Bush sjáum við GOP forseta sem hefur alfarið gefið upp á bátinn minnkandi ríkisumsvifin, og berst í staðinn einna helst fyrir áframhaldandi þenslu ríkisvaldsins undir alvitri handleiðslu Guðs.
Hún er sorgleg flóran í bandarískri pólítík þessa dagana. Annars vegar er um að velja sósíaldemókrata með altrúisma og fórnfýsi sem æðsta stall siðferðis (eða þá að siðferði sé ekki til, sé hræsni eða hvaðeina), og hins vegar sósíalrepúblikana með óskeikult orð Guðs sem hina æðstu mælistiku siðmenntar.
Horfin er frjálshyggjan og framsýnin sem forðum mótaði mesta velmegunarsamfélag mannkynssögunnar.
Þessar yfirlýsingar væru þrælfyndnar ef þær kæmu ekki frá voldugum manni í stjórn BNA.
Er frjálshyggjan að fara í tilvistarkreppu?