---

Í dag er nákvæmlega eitt ár síðan fyrsta tölublað Skoðunar kom út. Á þessum tíma höfum við fengið mikið magn tölvupósts frá lesendum, bæði jákvæð og neikvæð skilaboð. Við gerðum okkur leik að því að renna í gegnum póstinn og draga fram það sem okkur þótti athyglisvert.

Margir lýstu ánægju með nýju uppgötvunina í fjölmiðlaheiminum
Hæ!
Mér líst vel á þetta vefrit ykkar – þetta er alveg sæmilega áhugavert, og það vill þannig til að ég er sammála mörgu sem þið eruð að segja. Mér fannst greinin um nektardansstaðina mjög góð.

Til hamingju með síðuna. Hún lítur vel út og ekki er síður ánægjulegt að sjá aftur frjálslyndar skoðanir ungra jafnaðarmanna. Velkomnir í flóru vefrita.

Gott framtak hjá ykkur !
Ef þið haldið ykkur við efnið(n) næstu ár verður þetta besta vefsíðan. Ferskur blær frá flestu öðru og maður pottþétt tékkar á skrifum ykkar.

Ég vil óska ykkur til hamingju með þetta framtak. Það er alltaf gaman að sjá þegar ungir menn koma skoðunum sínum á framfæri og þetta framtak ykkar er þarft. Það þarf meiri mótvægi við andríki og frelsi þeirra stuttbuxnastráka í Sjálfstæðisflokknum.

Eftir ýmis heillaóskaskeyti fengum við þetta frá skólafélaga annars ritstjóranna í júlí síðastliðnum
Ég fór aftur inn á heimasíðu þá sem þið kommafélagar hafið nýlega stofnað. Ég las tvær greina þinna, um bjórauglýsingar og fáfræði sem orsök styrjalda og ég verða að segja að enda þótt ég sé ekki fyllilega sammála skoðunum þínum þá er síðan öll hin glæsilegasta og óska ég ykkur innilega til hamingju með hana. Við getum síðan rökrætt bjórauglýsingar seinna við betra tækifæri.

Við þökkum alltaf lofið en þykir miður að við séum sakaðir um kommúnisma sem er þó ansi algeng ásökun, nema auðvitað frá vinstrimönnum sem hafa sagt okkur alltof hægrisinnaða eins og vinkona okkar af vinstrivængnum sem sendi okkur þetta skeyti.
Er það pólitískt klókt fyrir unga jafnaðarmenn, sem eru í stjórnarandstöðu síðast þegar vitað var, að bergmála gersamlega skoðanir Heimdallar í RÚV-málinu? Ef rökin eru þau að ríkið eigi ekki að reka sjónvarpsstöð af því að einkaaðilar geta þar, gilda þau þá ekki um fleira? Einkaaðilar geta og hafa rekið leikskóla, heilsugæslustöðvar og fleira. Á þá ekki að selja þetta allt saman samkvæmt þessu? Of ef það er skoðun „ungra jafnaðarmanna“, af hverju eru þeir þá ekki í Heimdalli?

Á það má reyndar benda að frá þessum tíma hefur annar ritstjóri Skoðunar sagt sig úr Samfylkingunni (án þess að hafa nokkurn tíma gengið í hana).

Aðrir tjáðu sig um einstaka greinar
Brennið í helvíti hommavinir. nei bara djók

Brilliant grein um fóstureyðingar, alveg hreint afbragð.

Mikilvægt er, ef menn skrifa í fyrstu persónu, að þeir tilgreini hverjir þeir eru. Því langar mig að vita hver sá er, sem hefur enga þekkingu í hugmyndafræði frjálshyggjunnar, en skrifar samt pistil um frjálshyggju og frelsi undir stöfunum khs.

Reyndar teljum við rétt að benda á það að það hefur frá upphafi verið ritstjórnarstefna Skoðunar að merkja greinar höfundum, fyrst með upphafsstöfum en í kjölfar þessa bréfs með fullum nöfnum okkar. Reyndar gerðist það fyrir mistök í þetta skipti að grein Kolbeins, sem enn var ekki kominn í ritstjórn og þar með ekki nafngreindur í ritstjórnarkynningu, var merkt upphafsstöfum. Því var þó breytt þegar í stað.

Varðandi þá grein sem birtist á vef ykkar um frelsi og félagshyggju skal það tekið fram að Vaka hefur allt frá stofnun félagsins 1935 barist gegn þeim hugmyndum að tekin verði upp skólagjöld við Háskóla Íslands og ríkir enn mikill einhugur um þá stefnu. Í fyrr nefndri grein er gefið í skyn að svo sé ekki og harma ég að svo órökstuddar dylgjur séu settar fram á jafn vönduðum netfjölmiðli og mér þykir Skoðun vera. Það má líka segja að það sé óheppilegt þar sem í gegnum tíðina hafa fjölmargir félagar í SUJ lagt frjálslyndum stúdentum í Vöku lið sitt og unnið þar öflugt starf og verið áberandi.

Ég er einn af þeim sem kjósa að standa utan trúfélaga og vona að sá dagur renni upp að ríkið hætti að reka einstök trúfélög. Ég vil samt benda á orð sem þú notar og er ekki rétt, það er orðið „þjóðkirkja“, en þetta er reyndar „ríkiskirkja“. Orðið „þjóðkirkja“ er er ekki rétt þar sem hluti þjóðarinnar kýs að vera ekki skráður í þetta trúfélag. Sjá greinina Aðskiljum ríki og kirkju.

Við tökum því ekki þegjandi þegar við erum sakaðir um lygar. Þess vegna skrifaði Sigurður Hólm þessa grein eftir að lesandabréf birtist í Morgunblaðinu undir fyrirsögninni „Formaður ungra jafnaðarmanna segir ósatt“.
Svona á að gera þetta!! Reka heimskuna, fáfræðina og fordómana ofan í hálsinn á fólki með þekkingu. Ég held með ykkur!
Way to go, láttu Hróbjart Guðsteinsson heyra það. Almúgamaðurinn

Okkur fannst það frábært þegar ný sjónvarpsstöð, Skjár einn, fór í loftið og óskuðum þeim til hamingju. Þær hamingjuóskir féllu sums staðar í grýttan jarðveg.
Ykkur hefur ekkert fundist skrýtið að Davíd Oddsson var ekki bara aðalmaðurinn í því að segja hvað S1 væri gott framtak í einhverri opnunarviðtali við hann, heldur talaði fréttastofan við hann í þremur af sjö fréttum í fréttatímanum.. Ok.. hann er kannski forsætisráðherra, en það þýðir alls ekki að hann hafi rétt fyrir sér.

Aðrir voru sáttari
Takk fyrir velvildina í garð Skjás eins. Hér kveður að sönnu við nokkuð annan tón en á Gróskuvefnum þar sem ungliðarnir finna þessu allt til foráttu. Haldið endilega áfram að skrifa.

Þegar Brynjólfur útlistaði nokkrar ástæður fyrir því að hann væri krati en ekki Sjálfstæðismaður voru gerðar athugasemdir við einstaka liði röksemdafærslunnar:
18) Ég læt aðra ekki segja mér fyrir verkum eins og ungir sjálfstæðismenn hafa alltof oft gert.

Alls ekki sammála. Heimdallur hefur sýnt það og sannað að hann gengur oft þvert á skoðanir þeirra sem þið viljið kalla „flokksforystuna“. Það sýndi sig glögglega á síðasta landsfundi það sem við vorum með mjög ýtarlegar breytingartillögur í öllum málaflokkum, sem oftast áttu alls ekki upp á pallborðið hjá forystumönnum. Við erum dugleg að segja þingmönnum hvað flokkurinn á að standa fyrir og við höfum ráðist á garðyrkjubændur þrátt fyrir að varaþingmaður sjálfstæðismanna á suðurlandi sé formaður garðyrkjubænda. Ég gæti haldið svo lengi áfram en tími minn er knappur en þetta var bara svo mikil vitleysa að ég varð að skrifa nokkrar línur. Annars eru pistlarnir oft ansi góðir.
Ef til vill er ekki fjarri að viðkomandi athugasemd hafi átt rétt á sér. En það viðurkennum við auðvitað ekki opinberlega.

Ég er ekki hlynntur líkamlegum „refsingum“ á börnum. Hins vegar finnst mér að börn megi alveg vita að þau komist ekki upp með hvað sem er… Ég vil auðvitað ekki að börn séu lamin til hlýðni en gamla góða rassskellingin skaðar engan.
Það voru ekki allir sammála tveimur greinum (fyrri grein, síðari grein) Sigurðar um góðar og slæmar uppeldisaðferðir.

Mjög þarfur og góður pistill um gagnagrunninn.

Ég gæti ekki verið meira sammála Sigurði Hólm Gunnarssyni. Gott að vita af hugsandi mönnum.
Við höfum enn ekki áttað okkur á hvaða grein var verið að fjalla um enda lítil takmörk fyrir vitleysunni sem veltur upp úr pilti.

amen

Þið eigið sérstakt hrós skilið fyrir greinina um pólitískt skítkast.
Sem er afskaplega gott að heyra, sérstaklega eftir að höfundur greinarinnar mátti hlýða á langa og háværa skammarræðu stjórnarmanns úr UJ eftir að greinin birtist.

Einn er sá maður sem ritstjórar Skoðunar binda vonir við að eigi mikla og bjarta framtíð fyrir sér sem rithöfundur. Hann hefur reyndar meiri áhuga á vísindaskáldskap heldur en pólitískri leikritasmíð þannig að óvíst er hvort fleiri leikþættir eftir hann birtist á Skoðun. Heyrst hefur að væntanleg sé írónísk gamansaga sem gerist í fjarlægri framtíð og nefnist Samfylkingin í stjórn.

Þessi leikþáttur hans Kolbeins er ágætur. Gaman að sjá menn opinbera sína eigin heimsku með þessum hætti. Prik í kladdan hjá mér fyrir það.

Þessi leikþáttur er lélegur, ófyndinn og smekklaus, oft hefur verið gaman að skoða síðuna ykkar en í þetta sinn farið þið niður á þroskastig gagnfræðiskólanema.

Var að lesa greinina hans Kolla Stefáns varðandi Björgvin Guðmundsson og Sjálfstæðisflokkinn og ég lá úr hlátri. Þessi grein er mjög góð og kjarnyrt. Ég bíð spenntur eftir næstu grein.

Eftirfarandi texta var að finna í skeyti sem bar fyrirsögnina Hreint land fagurt land:
Sigurður, mér finnst þú vera að rugla saman rasisma og þeirri umræðu sem hér hefur farið fram síðastliðna mánuði. Það eru ekki allir rasistar sem vilja ekki fjölga útlendingum hér á landi. Staðreynd málsins er sú að innflytjendum fylgja vandamál. Líttu t.d. á Danmörk og Svíþjóð. Þar hafa ríkisstjórnirnar hleypt mikið af illa menntuðum útlendingum sem ekki tala tungumál landanna sem þau eru að fara til. Fólkið í þessum löndum má svo ekki tala um það að það vilji ekki fá fleiri útlendinga án þess að eiga það á hætta að vera úthrópað kynþáttahatarar. Mikill hluti þessa fólks lendir í fátækragildru vegna þess að það er illa menntað og tala ekki tungumál þeirra landa sem þau fara til.

Ekki nóg með það að fólkið verði fátækt, heldur gerir það einnig aðra íbúa landsins fátækara. Bæði vegna þess að íbúar sem fyrir eru þurfa að borga hærri skatta (það þarf jú að hjálpa þessu fólki að koma undir sig fótunum), en einnig eykst framboð ófaglærðra á vinnumarkaði sem veldur því að laun illa menntaðs fólks lækka en meir. Ég vill líka benda á óeirðir milli kynþátta sem eiga stað með reglulegu millibili og að innflytjendur lenda mun oftar í afbrotum (a.m.k. í skandinavíu) en þeir sem eru fæddir og upp aldir í landinu.

Ég vil byrja á að þakka fyrir ferskasta og málefnalegasta vefritið sem kemur frá vinstri kantinum. Þið eruð lifandi sönnun þess að íslenskir jafnaðarmenn eygja enn von á valkosti við sænskan sósíalisma eða herinnburt-afturhaldshyggju.

Aftur á móti á ég erfitt með að skilja þennan biturleika ykkar gagnvart Sjálfstæðisflokknum. Hann er einfaldlega illskásti kosturinn fyrir fólk með þær skoðanir sem Kolbeinn viðrar á vefnum ykkar, sérstaklega eftir að Samfylkingin kom til sögunnar og varð fjórði framsóknarflokkurinn í íslenskri pólitík.

Ég hef sjaldan haft gaman að klósetthúmor, en get ekki látið hjá leiðast að glotta út í annað yfir uppátæki Kristnihátíðarnefndar. Það er alkunna að Marteinn Lúther samdi sín helstu trúarrit í minnsta herbergi húss síns og háði þar meira að segja harða rimmu við Kölska sjálfan. Þetta er sumsé alltí trúarsögulegu samhengi, en ekki minna fyndið fyrir það.

Fyrst, þakkir fyrir skemmtilegt vefrit. Þó ég myndi eflaust skipa mér hægra megin við ykkur á kvarðann fræga, hefur mér ekki tekist að finna neina aðra lesningu á íslenska hluta vefsins sem ég kann því jafn vel að lesa og Skoðun. Það sem svo oft vantar í þeim greinum um stjórnmál sem birtast, hvort heldur það er frá áhugamönnum eða atvinnumönnum, er sómasamlegur rökstuðningur. Frelsarinn er að jafnaði ágætis case-in-point, sbr. nýlegagrein þar sem því er haldið fram að VG sé arfinn í gróðurhúsi íslenskra stjórnmála. Helstu rökin sýnast mér vera þau að þar fari „[f]ólk sem lítur á klassískar kennisetningar sósialista sögunnar sem vegvísir [!] í hugmyndafræði“ ásamt því að Steingrímur J. hafi einhvern tímann fengið sér bjór. Gaman er að bera þetta saman við ágætlega rökstudda grein dagsins á Skoðun, þar sem Brynjólfur Þór félagi þinn færir rök fyrir því að öðru en Evrópustefnunni beri að kenna um fylgistap Alþýðuflokksins ’95. Hvort tveggja eru í sjálfu sér greinar um flokkapólitík, en mér hugnast einfaldlega betur að lesa ykkar nálgun en nálgun Frelsismanna – sem þó er allt of útbreidd.

Já, mér finnst reyndar stór skrítið að jafn greindur maður og þú augljóslega ert, geti látið annað eins þvaður frá þér.

Sigurður, þessi skoðun þín varðandi boxið er stórhættuleg og kom mér á óvart miðað við önnur skrif ykkar.

Reyndar voru ekki allir á sömu skoðun.
Strákar, ég er orðinn drulluþreyttur á þessum hnefaleikatali. Pólitík snýst ekki um hnefaleika. Og svona by the way, þá er ég á móti ólympísku boxi eða öðru boxi. Þetta snýst ekki um val fólks, því ef það er málið, þá getum við alveg eins leyft fíknefni.

Svo var tilgreindur munurinn á ólympískum hnefaleikum og löglegum slagsmálaíþróttum.

Ég er með fjögur kjú í karate og hef prófað ólympíska hnefaleika. Munurinn þar á er rosalegur. Ég hef keppt á mótum og gefið mönnum blóðnasir. En þá var ég rekinn út af. Þannig er það, ef mönnum blæðir í ólympískum hnefaleikum þá er bara sagt töff lokk. Menn skora stig og er oft á tíðum nægjanlegt að hitta þrisvar til að vinna í karate. En í ólympískum hnefaleikum er bara lamið og lamið. Ég prófaði þetta með kunningja mínum sem er búinn að æfa þetta í eitt ár. Við vorum ekki að taka mikið á en ég var með hausverk í marga daga eftir þetta. Það er himinn og haf á milli karate og ólympískra hnefaleika og því er ég hjartanlega sammála þér.

Svo fengum við þetta í bréfi skömmu síðar
Einhver fréttamanna SkjásEins komst skemmtilega að orði þegar hann benti á það að margir þingmenn sem tóku þátt í að fella frumvarpið stunda sjálfir með hættulegri íþróttum sem fyrirfinnast: innanhússfótbolta „of“ þungra og „of“ gamalla manna.

Ýmis mál hafa vakið menn til umhugsunar
Ákvörðun Háskólayfirvalda að bjóða upp á MBA-nám sem skal fjármagnað með skólagjöldum hefur valdið miklum titringi í þjóðfélaginu.

Ég spái því (eins og Gunnar Smári Egilsson benti á í Morgunsjónvarpinu) að eftir nokkur ár muni nýútskrifaður Master í viskiptafræði fara í mál við ríkið og krefjast endurgreiðslu á skólagjöldum vegna MBA námsins. Yfirleitt tapar Háskólinn öllum málaferlum sem hann lendir í, sem bendir til þess að stjórnendur þar á bæ séu almennt afar illa að í lögum!

Háskólinn er sveltur og neyðist til þess að skilgreina viðurkennt framhaldsnám með þessum vafasama hætti; Markaðsvæðingu skólakerfisins er með öðrum orðum smokrað inn bakdyrameginn.

Mér finnst nú alveg með ólíkindum að ríkissstjórnin ætli að selja Landssímann til eins aðila og það erlendum! Reyndar má svo sem segja það að Landssíminn myndi hvort heldur eð er lenda í höndunum á meira eða minna einum aðila að lokum, hvort sem selt yrði strax til eins eða ekki. Það er nú nefnilega þannig með þennan markað að ríkið ræður ekki neitt við neitt. Ríkisstjórnin stjórnar ekki ríkinu!
Fleira hefur verið sagt um útgáfuna
Ég vildi bara hrósa ykkur fyrir breytingarnar. það er ánægjulegt að uppfærslur hjá ykkur verða tíðari í framtíðinni.

Takk. Innan ritstjórnar eru umræður um að auka útgáfutíðnina enn frekar. Óvíst er hvort og hvenær af því verður en við stefnum að því að verða á undan mánudagsútgáfu Moggans.

Í skilaboðum frá ritstjórn kemur í lokin lítil klausa: „Ritstjórar áskilja sér þó rétt til að hafna því að birta greinar telji þeir ástæðu til.“ Væri ekki rétt að kalla þessa síðu „Ákveðin skoðun“?

Ef til vill. En svo má auðvitað benda á grein okkar um að selja Ríkisútvarpið og grein lesanda sem vildi halda í það og boxumræðuna sem verður komið að síðar. Við ritskoðum greinar sem okkur finnst innihalda persónuníð eða annað sem við teljum að valdi því að greinin teljist ekki birtingarhæf í jafn merku riti og Skoðun. Ritstjórn hvetur lesendur því til að senda inn greinar sem þeir vilja koma á framfæri.

Þegar einn ritstjórnarmeðlimur skrapp í sumarfrí til Spánar bilaði tölva þess sem átti að sjá um uppfærslur. Nú er ferðalangurinn kominn heim og ljóst að tölva hins fer að komast í lagið en þá hefur tölvu þriðja ritstjórnarmeðlimsins verið stolið. Eftir sem áður er gott að vera komnir aftur og gaman að heyra að einhverjir fylgjast með.

Heilir og sælir félagar og velkomnir aftur online. Ég er ánægður með síðustu grein ykkar. Gæti ekki verið meira sammála!

Viðkomandi var augljóslega ekki sá eini sem saknaði okkar
Gæti ekki verið meira sammála pistli BÞG um flutning jafnréttismála og fartölvuvæðingu skóla. Gaman að sjá ykkur vera komna aftur, ég hélt jafnvel að þið væruð hættir.

Svo voru aðrir sem bentu á það sem betur mætti fara
Ef svo er, langar mig að benda á aðferð til þess ná meiri athygli. Vera svolítið agressívari í tali, t.d. að nota þá íslensku sem nýja kynslóðin skilur „Ráðherra ullar á þjóðina“ færa síðan rök fyrir því. „Dónaskapur forsætiráherra virðis ekki eiga sér nein takmörk“ o.s.frv.
Umfram allt, ekki vera of kurteisir.

Sælir, ágætt framtak hjá ykkur. Mig langaði bara að koma einu á framfæri. Mér finnst hreyfirósin (animation af rós í neðra vinstra horni) vera afleit. Þegar ég les textann sé ég þetta alltaf út undan mér. Að mínu mati væri alveg eins flott að hafa hana bara óhreyfða.

Ritstjórar Skoðunar eru ekkert ef ekki snöggir að bregðast við óskum lesenda. Þetta skeyti barst 19. október 1999 og rósin í horninu hvarf skömmu síðar, í júní 2000.

Fegurðardrottningarþakkirnar
Þegar við hófum útgáfu Skoðunar upphaflega vorum við ekki vissir um hvort nokkur maður myndi leggja það á sig að lesa aðfinnslur okkar og athugasemdir. Þau viðbrögð sem við höfum fengið sýna þó að margir láta sig varða hvað við látum fara frá okkur. Við þökkum því fyrir allan þann póst sem við höfum fengið, án hans væri þetta lítils virði. Hér að ofan sést lítill hluti þess sem okkur hefur borist, við ákváðum að birta ekki það sem við töldum of tengt persónu þess sem skrifaði auk þess sem þessi litla afmælisveisla okkar er orðin nógu löng fyrir ársgamalt ungabarn. Þess vegna hvetjum við lesendur eindregið að senda okkur póst með athugasemdum og uppástungum auk þess að vera ófeimnir við að senda okkur greinar til birtingar.

Þá teljum við rétt að tilkynna það hér með að innan skamms mun Skoðun hafa vistaskipti og flytja sig yfir á vefslóðina www.skodun.is. Meira um það á næstunni.

Ritstjórn Skoðunar