---

Eins og má segja um svo marga aðra þá óskum við eftir hinu og þessu í jólagjöf. Nú ætlum við okkur hins vegar að setja okkur í hátíðlegri stellingar og óska okkur einhvers sem kemur fleirum en okkur sjálfum til góða. Við biðjum ekki um frið á jörð þar sem við vitum að það er nokkuð vonlaust en þess í stað um ýmislegt sem er auðveldara að hrinda í framkvæmd.

Betra menntakerfi
Við viljum að meiri metnaður ráði ríkjum í menntamálum, það þýðir ekki aðeins að meiri fjármunum verði varið í menntakerfið heldur einnig og ekki síður að það verði endurskoðað. Við viljum að grunnskólanum verði breytt stórlega og námið byggt á heimspekilegum grunni, lögð verði áhersla á siðfræði og rökfræði auk tjáningar.

Þá viljum við að Lánasjóðurinn fari að taka mið af aðstæðum námsmanna í dag (þá erum við báðir nokkuð betur settir þangað til við þurfum að fara að borga af lánunum okkar). sjá: menntun með markmið, menntamál.

Sanngjarnt landbúnaðarkerfi
Ríkisstyrkir og innflutningstakmarkanir hafa ekki aðeins komið niður á neytendum og skattgreiðendum heldur líka á bændum sjálfum. Þetta eru bæði gömul og ný sannindi. Þess vegna hvetjum við alla til að kynna sér muninn á stöðu bænda sem njóta beinna ríkisstyrkja og þeirra sem njóta þeirra ekki, þar kemur ýmislegt mörgum á óvart. sjá: Landbúnaður á villigötum, Skuggahliðar íslensk landbúnaðar.

Aðskilnaður ríkis og kirkju
Sumum kann að finnast að þetta sé ekki við hæfi um jólin. En hvers vegna ekki að veita kirkjunni sjálfstæði frá stjórnvöldum á þessum tíma. Hvers vegna ekki að leysa almenning undan greiðslum til trúmála upp á hátt í þrjá milljarða á ári hverju. Skoðanakannanir hafa einnig margoft sýnt fram á það að meirihluti almennings er hlynntur aðskilnaði ríkis og kirkju. sjá: Mikilvægt skref í átt að trúfrelsi, Aðskiljum ríki og kirkju, Trúarmiðstýringu fagnað, Ríkisrekin kirkja er úrelt fyrirbrigði.

Auðlindagjald
Ekki svo að við viljum vera vondir við útgerðarmenn sem eru misjafnlega staddir eins og gengur og gerist. Staðreyndin er hins vegar sú að með því að úthluta veiðiheimildum gjaldfrjálst erum við að gefa milljarða til fámennra hópa sem ella væri hægt að nýta í ýmis þörf verkefni. Því má svo að sjálfsögðu ekki gleyma að veiðiheimildir eru auðæfi sem urðu til við lagasetningu á Alþingi. sjá: Réttlæti og hagkvæmni í sjávarútvegi

Sameining ráðuneyta
Hvers vegna að starfrækja nokkur hagsmunaráðuneyti (sjávarútvegs-, landbúnaðar-, iðnaðar- og viðskiptaráðuneyti) þegar við getum sameinað þau í eitt atvinnumálaráðuneyti sem verður að taka tillit til fleiri þátta en bara hagsmuna sinnar greinar? Með því að sami ráðherra fer með málefni allra atvinnugreina minnka möguleikar hagsmunaaðila til að stjórna “sínum” ráðuneytum í sama mæli og hingað til. sjá: Kostnaðarsöm afglöp stjórnmálamanna, Sameinum atvinnuráðuneytin

Minni ríkisrekstur
Ríkisútvarp, ríkisbankar, ríkiskirkja, ríkishljómsveit og ríkisleikhús. Peningum almennings er ausið í alls konar verkefni sem einkaaðilar eru fullfærir um að sjá um. Á sama tíma er fjárskortur víða í félagslega kerfinu, heilbrigðismálum og menntamálum. sjá: Þar sem ríkisrekstur á ekki heima, Seljum RÚV, Eru ríkisafskipti allra meina bót?

Byggðastefna sem getur virkað
Hvernig væri að hætta að halda uppi gjaldþrota atvinnugreinum á kostnað atvinnugreina sem geta byggt upp samfélög í stað þess að lengja hengingaról þeirra? Þannig verða menn að hætta að reyna að koma í veg fyrir þróunina sem hefur átt sér stað alla þessa öld og meta hvar sé byggilegt og hvaða staðir sé ljóst að fari í eyði á endanum. Núverandi byggðastefna hefur, eins og reynslan sýnir, ekki skilað raunverulegum árangri. Þess vegna viljum við prófa að byggja upp byggðakjarna þar sem fjölbreyttara mannlíf og atvinnu- og menntunartækifæri eru hluti af lífvænlegu samfélagi. sjá: Sökkvum Eyjabökkum en virkjum ekki, Hver er byggðavandinn?, Nýja byggðastefnu

Aðildarumsókn að Evrópusambandinu
Hverjum hefði dottið það í hug fyrir örfáum árum að allt útlit væri fyrir að flest ríki Austur-Evrópu og meira segja mannréttindabrjóturinn Tyrkland væru komin í Evrópusambandið á undan Íslandi. Bætt samkeppnisaðstaða íslenskra fyrirtækja og nokkur áhrif á ákvarðanatöku innan Evrópusambandsins eru bara tvö af mörgum hagsmunamálum sem nást fram með aðild. sjá: Sækjum um aðild að ESB, Hvað varð um Evrópu?

Súlu á hvert heimili
Harði pakkinn í ár. Gleður og kætir auk þess sem hún hvetur til málefnalegra og yfirvegaðra skoðanaskipta. sjá: Um nekt og aðrar freistingar holdsins, Siðvendni og forsjárhyggja

Eins og ofangreindur listi sýnir þá biðjum við ekki um mikið. Þetta eru einfaldlega jólagjafir sem við teljum að almenningur eigi skilið.

Gleðileg jól
Brynjólfur Þór Guðmundsson
Sigurður Hólm Gunnarsson